മെല്‍ബണ്‍: 106 വര്‍ഷത്തെ ഇടവേളയ്ക്ക് ശേഷം മെല്‍ബണ്‍ മൈതാനത്ത് അരങ്ങേറിയ ആദ്യ വനിതാ ടെസ്റ്റില്‍ ഇംഗ്ലണ്ടിനെ ഇന്നിങ്‌സിനും 122 റണ്‍സിനും തകര്‍ത്ത് ഓസ്‌ട്രേലിയന്‍ വനിതകള്‍. ഏക ടെസ്റ്റ് പോരാട്ടവും ജയിച്ചതോടെ വനിതാ ആഷസില്‍ ഓസ്‌ട്രേലിയ സമ്പൂര്‍ണ ജയം സ്വന്തമാക്കി. ഇംഗ്ലണ്ടിന്റെ ഓസീസ് പര്യടനം വൈറ്റ് വാഷ് നാണക്കേടായി മാറുകയും ചെയ്തു.
നേരത്തെ മൂന്ന് വീതം മത്സരങ്ങളടങ്ങിയ ഏകദിന, ടി20 പോരാട്ടങ്ങളിലും ഓസ്‌ട്രേലിയ സമ്പൂര്‍ണ വിജയം സ്വന്തമാക്കിയിരുന്നു. 1949നു ശേഷം ആദ്യമായാണ് മെല്‍ബണ്‍ ഗ്രൗണ്ടില്‍ ഒരു വനിതാ ടെസ്റ്റ് പോരാട്ടം അരങ്ങേറിയത്.
ഇംഗ്ലണ്ടിന്റെ ഒന്നാം ഇന്നിങ്‌സ് 170 റണ്‍സില്‍ അവസാനിച്ചിരുന്നു. ഒന്നാം ഇന്നിങ്‌സില്‍ ഓസ്‌ട്രേലിയ 440 റണ്‍സെന്ന മികച്ച സ്‌കോര്‍ പടുത്തുയര്‍ത്തുകയും ചെയ്തു. 270 റണ്‍സിന്റെ ലീഡ് വഴങ്ങി രണ്ടാം ഇന്നിങ്‌സ് തുടങ്ങിയ ഇംഗ്ലണ്ടിന്റെ പോരാട്ടം വെറും 148 റണ്‍സിലും തീര്‍ന്നു. വെറും 3 ദിവസം കൊണ്ട് ഓസ്‌ട്രേലിയ ഏക ടെസ്റ്റില്‍ വിജയിച്ച് ആഷസ് പോരാട്ടം തൂത്തുവാരി.
ഇംഗ്ലണ്ടിനെ ഒന്നാം ഇന്നിങ്‌സില്‍ 4 വിക്കറ്റെടുത്ത അലന കിങാണ് തകര്‍ത്തത്. കിം ഗാര്‍ത്, ഡാര്‍സി ബ്രൗണ്‍ എന്നിവര്‍ രണ്ട് വീതം വിക്കറ്റുകളും വീഴ്ത്തി. ആഷ്‌ലി ഗാര്‍ഡ്‌നര്‍ ഒരു വിക്കറ്റെടുത്തു. രണ്ടാം ഇന്നിങ്‌സിലും അലന തിളങ്ങി. താരം 5 വിക്കറ്റുകള്‍ വീഴ്ത്തി. രണ്ടിന്നിങ്‌സിലുമായി 9 വിക്കറ്റുകള്‍. ആഷ്‌ലി ഗാര്‍ഡ്‌നര്‍ 4 വിക്കറ്റുകള്‍ രണ്ടാം ഇന്നിങ്‌സില്‍ വീഴ്ത്തി. ഡാര്‍സി ബ്രൗണ്‍ ഒരു വിക്കറ്റെടുത്തു.
ഒന്നാം ഇന്നിങ്‌സില്‍ നാറ്റ് സീവര്‍ ബ്രന്‍ഡ് (51) ആണ് ഇംഗ്ലണ്ടിനായി ഭേദപ്പെട്ട പ്രകടനം നടത്തിയത്. രണ്ടാം ഇന്നിങ്‌സില്‍ ടാമി ബ്യുമോണ്ട് (47), ക്യാപ്റ്റന്‍ ഹിതര്‍ നൈറ്റ് (32) എന്നിവരാണ് പിടിച്ചു നിന്നത്.
നേരത്തെ അന്നബല്‍ സതര്‍ലാന്‍ഡ് (163), ബെത് മൂണി (106) എന്നിവര്‍ നേടിയ സെഞ്ച്വറികളുടെ ബലത്തിലാണ് ഓസ്‌ട്രേലിയ 440 റണ്‍സ് പടുത്തുയര്‍ത്തിയത്. ഇംഗ്ലണ്ടിനായി ബൗളിങില്‍ സോഫി എക്ലസ്റ്റോണാണ് തിളങ്ങിയത്. താരം 5 വിക്കറ്റുകള്‍ സ്വന്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates