റാഞ്ചി : ഏകദിന ക്രിക്കറ്റിലെ ലോക റെക്കോർഡ് സ്കോർ കുറിച്ച് ബിഹാർ. വിജയ് ഹസാരെ ട്രോഫി ക്രിക്കറ്റ് ടൂർണമെന്റിൽ അരുണാചൽ പ്രദേശിനെതിരെയാണ് ബിഹാറിന്റെ കൂറ്റൻ സ്കോർ. അമ്പത് ഓവറിൽ ടീം ബിഹാർ ആറു വിക്കറ്റ് നഷ്ടത്തിൽ 574 റൺസെടുത്തു. ലിസ്റ്റ് എ ക്രിക്കറ്റിൽ ഒരു ടീം നേടുന്ന ഉയർന്ന സ്‌കോറാണിത്.

മത്സരത്തിൽ വൈഭവ് സൂര്യവംശിക്കു പുറമെ, ആയുഷ് ലൊഹാരുക, സാകിബുൾ ഗനി എന്നിവരും സെഞ്ച്വറി നേടി. ലിസ്റ്റ് എ ക്രിക്കറ്റിലെ ഇന്ത്യക്കാരന്റെ ഏറ്റവും വേഗമേറിയ സെഞ്ച്വറിയും ഗനി സ്വന്തം പേരിലാക്കി. 32 പന്തിലാണ് ബിഹാർ നായകന്റെ മിന്നൽ ശതകം. 35 പന്തിൽ സെഞ്ച്വറി നേടിയ പഞ്ചാബിന്റെ അൻമോൽ പ്രീത് സിങ്ങിന്റെ റെക്കോർഡാണ് ​ഗനി തിരുത്തിയെഴുതിയത്. മത്സരത്തിൽ ​ഗനി 40 പന്തിൽ 128 റൺസെടുത്തു.

വിജയ് ഹസാരെ ക്രിക്കറ്റിലെയും ലിസ്റ്റ് എ ക്രിക്കറ്റിലെയും ഏറ്റവും വേ​ഗമേറിയ സെഞ്ച്വറിയാണിത്. ലിസ്റ്റ് എ ക്രിക്കറ്റിൽ ലോകത്തെ മൂന്നാമത്തെ വേ​ഗമേറിയ സെഞ്ച്വറി കൂടിയാണ് ​ഗനിയുടേത്. 29 പന്തിൽ സെഞ്ച്വറി നേടിയ ജേക്ക് ഫ്രെയ്സർ മക്​ഗുർക് , 31 പന്തിൽ സെഞ്ച്വറി തികച്ച എ ബി ഡിവില്ലിയേഴ്സ് എന്നിവരാണ് സാകിബുൾ ​ഗനിക്ക് മുന്നിലുള്ളത്.

ആയുഷ് ലൊഹാരുക 56 പന്തിൽ 106 റൺസെടുത്തു. ലിസ്റ്റ് എ ക്രിക്കറ്റിലെ ഏറ്റവും ഉയർന്ന ടീം സ്കോർ എന്ന ലോക റെക്കോർഡ് കുറിച്ച ബിഹാർ തമിഴ്നാടിനെയാണ് പിന്തള്ളിയത്. 2022-23 സീസണിൽ അരുണാചൽ പ്രദേശിനെതിരെ തമിഴ്നാട് നേടിയ രണ്ട് വിക്കറ്റിന് 506 റൺസ് എന്ന റെക്കോർഡാണ് ബിഹാർ തിരുത്തിയെഴുതിയത്. നെതൽലാൻഡ്സിനെതിരെ ഇം​ഗ്ലണ്ട് നേടിയ നാലു വിക്കറ്റിന് 498 റൺസ് എന്നതാണ് മൂന്നാമത്തെ ഉയർന്ന സ്കോർ.