ലണ്ടന്: ലോക ടെസ്റ്റ് ചാമ്പ്യന്ഷിപ്പ് ഫൈനലില് വിജയത്തിലേക്ക് പൊരുതുന്ന ഇന്ത്യക്ക് കനത്ത തിരിച്ചടി. അഞ്ചാം ദിനത്തില് ബാറ്റിങ് പുനരാരംഭിച്ച ഇന്ത്യക്ക് വിരാട് കോഹ്ലിയേയും തൊട്ടു പിന്നാലെ രവീന്ദ്ര ജഡേജയേയും നഷ്ടമായി. സ്കോട്ട് ബോളണ്ടിന്റെ ഇരട്ട പ്രഹരത്തില് അഞ്ചാം ദിനത്തിലെ ആദ്യ സെഷനില് തന്നെ ഇന്ത്യ പരുങ്ങലിലായി.
കോഹ്ലി 49 റണ്സുമായി മടങ്ങി. സ്കോട്ട് ബോളണ്ടിന്റെ പന്തില് മുന് ഓസീസ് ക്യാപ്റ്റന് സ്റ്റീവ് സ്മിത്ത് അദ്ദേഹത്തെ ഉജ്ജ്വല ക്യാച്ചില് പുറത്താക്കി. തൊട്ടു പിന്നാലെ എത്തിയ രവീന്ദ്ര ജഡേജയും റണ്ണൊന്നുമെടുക്കാതെ വീണു. താരം വിക്കറ്റ് കീപ്പര് അലക്സ് കാരിക്ക് ക്യാച്ച് നല്കി മടങ്ങി.
444 റണ്സ് വിജയ ലക്ഷ്യത്തിലേക്ക് ബാറ്റേന്തുന്ന ഇന്ത്യ നിലവില് അഞ്ച് വിക്കറ്റ് നഷ്ടത്തില് 184 റണ്സെന്ന നിലയിലാണ്. ഇന്ത്യക്ക് ജയിക്കാന് 260 റണ്സ് കൂടി വേണം. 30 റണ്സുമായി അജിന്ക്യ രഹാനെയും നാല് റണ്ണുമായി ശ്രീകര് ഭരതുമാണ് ക്രീസില്.
ഒന്നാം ഇന്നിങ്സില് ഓസ്ട്രേലിയ 469ന് പുറത്തായപ്പോള് ഇന്ത്യയുടെ പോരാട്ടം 296 റണ്സില് അവസാനിച്ചു. ഓസ്ട്രേലിയ രണ്ടാം ഇന്നിങ്സില് എട്ട് വിക്കറ്റ് നഷ്ടത്തില് 270 റണ്സെടുത്തു ഇന്നിങ്സ് ഡിക്ലയര് ചെയ്തു.
രണ്ടാം ഇന്നിങ്സില് ഇന്ത്യക്ക് ശുഭ്മാന് ഗില്ലിനെയാണ് ആദ്യം നഷ്ടമായത്. താരം 18 റണ്സുമായി പുറത്തായി. ബോളണ്ടിനാണ് വിക്കറ്റ്. കാമറോണ് ഗ്രീനിന് ക്യാച്ച് നല്കിയാണ് ഗില് മടങ്ങിയത്.
പിന്നീട് രോഹിതിന് കൂട്ടായി ചേതേശ്വര് പൂജാര വന്നു. ഇരുവരും ചേര്ന്നു കളി ഇന്ത്യക്ക് അനുകൂലമാക്കി കൊണ്ടു വന്നു. എന്നാല് സ്കോര് 92ല് നില്ക്കെ രോഹിത് പുറത്തായി. 43 റണ്സെടുത്താണ് രോഹിത് മടങ്ങിയത്. തൊട്ടുപിന്നാലെ പൂജാരയും മടങ്ങി. താരം 27 റണ്സാണ് കണ്ടെത്തിയത്.
കൂറ്റന് ലക്ഷ്യത്തിലേക്ക് ബാറ്റിങ് തുടങ്ങിയ ഇന്ത്യക്കായി രോഹിത് ഗില് സഖ്യം അതിവേഗ തുടക്കമാണ് നല്കിയത്. ഇരുവരും 7.1 ഓവറിലാണ് 41 റണ്സ് ബോര്ഡില് ചേര്ത്തത്.
രണ്ടാം ഇന്നിങ്സില് ഓസ്ട്രേലിയ എട്ട് വിക്കറ്റ് നഷ്ടത്തില് 270 റണ്സ് നേടി ഇന്നിങ്സ് ഡിക്ലയര് ചെയ്തു. 66 റണ്സെടുത്തു പുറത്താകാതെ നിന്ന അലക്സ് കാരിയാണ് ടോപ് സ്കോറര്.
അലക്സ് കാരിയും വാലറ്റത്ത് മിച്ചല് സ്റ്റാര്ക്കും ചേര്ന്ന് ഓസീസ് ഇന്നിങ്സ് മുന്നോട്ടു നയിച്ചു. സ്റ്റാര്ക്ക് 41 റണ്സുമായി മടങ്ങി. പാറ്റ് കമ്മിന്സ് അഞ്ച് റണ്സില് പുറത്തായി. പിന്നാലെ ഓസീസ് ഇന്നിങ്സ് ഡിക്ലയര് ചെയ്തു.
ഇന്ത്യക്കായി രവീന്ദ്ര ജഡേജ മൂന്നും ഉമേഷ് യാദവ്, മുഹമ്മദ് ഷമി എന്നിവര് രണ്ടും വിക്കറ്റുകള് വീഴ്ത്തി. മുഹമ്മദ് സിറാജ് ഒരു വിക്കറ്റെടുത്തു.
നാലാം ദിനത്തില് തുടക്കത്തില് തന്നെ ലബുഷെയ്നിനെ ഓസീസിന് നഷ്ടമായി. താരം 41 റണ്സെടുത്താണ് മടങ്ങിയത്. പിന്നാലെ വന്ന കാമറോണ് ഗ്രീന് മികച്ച രീതിയില് തുടങ്ങിയെങ്കിലും അധികം ആയുസുണ്ടായില്ല. താരം 25 റണ്സുമായി പുറത്ത്. നാലാം ദിനത്തില് ഈ രണ്ട് വിക്കറ്റുകളാണ് ആദ്യ സെഷനില് ഓസ്ട്രേലിയക്ക് നഷ്ടമായത്.
രണ്ടാം ഇന്നിങ്സില് തകര്ച്ചയോടെയായിരുന്നു ഓസ്ട്രേലിയ തുടങ്ങിയത്. ഒരു റണ്ണുമായി വാര്ണറും 13 റണ്സുമായി ഉസ്മാന് ഖവാജയും മടങ്ങി. ഉമേഷ് യാദവും മുഹമ്മദ് ഷമിയുമാണ് വിക്കറ്റുകള് നേടിയത്.
പിന്നീട് സ്റ്റീവ് സ്മിത്തും മര്നെസ് ലബ്ഷെയ്നും ചേര്ന്ന് ഓസീസിന് മുന്നോട്ടു കൊണ്ടു പോയി. എന്നാല് സ്കോര് 86ല് നില്ക്കെ സ്മിത്തിനെ മടക്കി ജഡേജ ഇന്ത്യയെ വീണ്ടും കളിയിലേക്ക് മടക്കി എത്തിച്ചു. 34 റണ്സാണ് ഒന്നാം ഇന്നിങ്സിലെ സെഞ്ച്വറിക്കാരന്റെ സമ്പാദ്യം. സ്കോര് 100 കടന്നതിനു പിന്നാലെ ഒന്നാം ഇന്നിങ്സിലെ ടോപ് സ്കോറര് ട്രാവിസ് ഹെഡ്ഡും മടങ്ങി.
ഈ വാർത്ത കൂടി വായിക്കൂ
സമകാലിക മലയാളം ഇപ്പോൾ വാട്സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates