കൊളംബോ: തനിക്ക് ഉറക്കമില്ലാത്ത രാത്രികൾ സമ്മാനിച്ച ബൗളറായിരുന്നു ഇന്ത്യൻ ലെ​ഗ് സ്പിന്നർ അനിൽ കുംബ്ലേയെന്ന് ലങ്കൻ മുൻ നായകൻ കുമാർ സം​ഗക്കാര. ഓർത്തഡോക്സ് ലെ​ഗ് സ്പിന്നറല്ല കുംബ്ലേ. റൺസ് കണ്ടെത്തുക ​ദുഷ്കരമായിരുന്നു, സം​ഗക്കാര പറയുന്നു. 

വേ​ഗത്തിൽ,കൃത്യത നിറച്ചായിരുന്നു കുംബ്ലേയുടെ ഡെലിവറികൾ. കൂടുതൽ ബൗൺസും പേസും കണ്ടെത്താൻ അദ്ദേഹത്തിന് കഴിയും. ലൂസ് ഡെലിവറികൾ വിരളമായി മാത്രമാണ് കുംബ്ലേയിൽ നിന്ന് വരുന്നത് എന്നും സം​ഗക്കാര പറഞ്ഞു. ഐസിസി ഹാൾ ഓഫ് ഫെയിമിലേക്ക് കുംബ്ലേ എത്തിയതിന് പിന്നാലെ ഐസിസി പങ്കുവെച്ച വീഡിയോയിലാണ് സം​ഗക്കാരയുടെ വാക്കുകൾ.

പിച്ച് പരുക്കനാണെങ്കിൽ ബാറ്റ്സ്മാന് കുംബ്ലേയുടെ ഡെലിവറിയിൽ നിന്ന് ഭീഷണി ഒഴിവാക്കാനുള്ള സാധ്യതകളും കുറവാണ്. സ്നേഹമുള്ള മനുഷ്യനാണ്. തീവ്രതയുള്ള ക്രിക്കറ്ററാണ്. ലോക ക്രിക്കറ്റിലേയും ഇന്ത്യൻ ക്രിക്കറ്റിലേയും ചാമ്പ്യനാണ്, കുംബ്ലേയെ പ്രശംസയിൽ മൂടി സം​ഗക്കാര പറഞ്ഞു.

കുംബ്ലേ ടെസ്റ്റിലെ ഒരു ഇന്നിങ്സിൽ 10 വിക്കറ്റും വീഴ്ത്തിയത് എനിക്കിപ്പോഴും ഓർമയുണ്ട്. ‍‍ഡൽഹിയിലായിരുന്നു അത്. ഞാനായിരുന്നു അദ്ദേഹത്തിന്റെ പത്താമത്തെ ഇര. വളരെ പ്രയാസമാണ് കുംബ്ലേയെ നേരിടാൻ. മറ്റ് ലെ​ഗ് സ്പിന്നർമാരെക്കാൾ നേരിടാൻ കൂടുതൽ ദുഷ്കരം, പാകിസ്ഥാൻ മുൻ താരം വസീം അക്രം പറഞ്ഞു.