ബംഗളൂരു: ശ്രീലങ്കയ്ക്ക് എതിരായ പരമ്പരയിലെ രണ്ടാമത്തെ ടെസ്റ്റില്‍ ടോസ് ഇന്ത്യക്ക്. ടോസ് നേടിയ രോഹിത് ബംഗളൂരുവില്‍ ബാറ്റിങ് തെരഞ്ഞെടുത്തു. 

ഒരു മാറ്റം മാത്രമാണ് ഇന്ത്യന്‍ പ്ലേയിങ് ഇലവനില്‍ ഉള്ളത്. ആദ്യ ടെസ്റ്റില്‍ മൊഹാലിയില്‍ മികവ് കാണിക്കാന്‍ കഴിയാതിരുന്നതോടെ ജയന്ത് യാദവിന് ടീമിലെ സ്ഥാനം നഷ്ടമായി. അക്ഷര്‍ പട്ടേലാണ് ജയന്തിന് പകരം ടീമിലേക്ക് എത്തിയത്. പിങ്ക് ബോള്‍ ടെസ്റ്റില്‍ ഇംഗ്ലണ്ടിന് എതിരെ അക്ഷര്‍ പുറത്തെടുത്ത മികവും ബെംഗളൂരുവിലെ രാത്രി പകല്‍ ടെസ്റ്റില്‍ ടീമില്‍ ഇടം നേടാന്‍ അക്ഷറിനെ തുണച്ചു. 

പിച്ച് ഡ്രൈ ആയതിനാല്‍ ഒരു സ്പിന്നറെ കൂടി ഇലവനിലേക്ക് ചേര്‍ത്തു എന്നാണ് രോഹിത് ശര്‍മ ടോസിന്റെ സമയം പറഞ്ഞത്. മുഹമ്മദ് സിറാജ് പ്ലേയിങ് ഇലവനിലേക്ക് എത്തിയേക്കും എന്ന സൂചനയുണ്ടായിരുന്നു. എന്നാല്‍ സ്പിന്നിനെ പിന്തുണയ്ക്കുന്ന പിച്ച് എന്ന് വ്യക്തമായതോടെ അക്ഷറിന് നറുക്ക് വീണു.