സിഡ്‌നി: ക്രിക്കറ്റ് മൈതാനങ്ങളില്‍ അമ്പരപ്പിക്കുന്ന ക്യാച്ചുകള്‍ മിക്കപ്പോഴും സംഭവിക്കാറുണ്ട്. കഴിഞ്ഞ ദിവസം അത്തരമൊരു ക്യാച്ച് പിറന്നു. നിമിഷങ്ങള്‍ക്കൊണ്ട് അതിന്റെ വീഡിയോ വൈറലായി മാറുകയും ചെയ്തു.

ഓസ്‌ട്രേലിയയും വെസ്റ്റ് ഇന്‍ഡീസും തമ്മിലുള്ള രണ്ടാം ഏകദിനത്തില്‍ കാമറൂണ്‍ ഗ്രീന്‍ നേടിയ ക്യാച്ചാണ് ഇപ്പോള്‍ ശ്രദ്ധേയമായത്. മുഴുനീളെ ഡൈവ് ചെയ്ത് താരം ഒറ്റ കൈയില്‍ പന്തൊതുക്കിയതാണ് ശ്രദ്ധേയമായത്.

സീന്‍ ആബോട്ടിന്റെ പന്തില്‍ വിന്‍ഡീസ് താരം റോസ്റ്റന്‍ ചെയ്‌സിനെയാണ് ഗ്രീന്‍ തകര്‍പ്പന്‍ ക്യാച്ചെടുത്തു പുറത്താക്കിയത്. ഷോര്‍ട്ട് മിഡ് വിക്കറ്റിനിടയിലൂടെ പന്ത് കടത്താനായിരുന്നു ചെയ്‌സിന്റെ ശ്രമം. എന്നാല്‍ അസാധ്യമെന്നു തോന്നിപ്പിച്ച ആ പന്തിനെ മുഴുനീളെ ഡൈവ് ചെയ്ത് ഗ്രീന്‍ ഒറ്റകൈയില്‍ ഒതുക്കി.

രണ്ടാം മത്സരവും വിജയിച്ച് ഓസ്‌ട്രേലിയ ഏകദിന പരമ്പര 2-0ത്തിനു സ്വന്തമാക്കി. മൂന്ന് മത്സരങ്ങളാണ് പരമ്പരയിലുള്ളത്.