മുംബൈ: മത്സരം ​ഗ്രൗണ്ടിൽ നടന്നുകൊണ്ടിരിക്കുമ്പോൾ ക്യാപ്റ്റനും കോച്ചിനും തമ്മിൽ സംസാരിക്കാൻ അനുവദിക്കണം എന്ന് കിവീസ് മുൻ ഓൾറൗഡർ ഡനിയേൽ വെട്ടോറി. ഏതെങ്കിലും പ്രത്യേക ഉപകരണത്തിന്റെ സഹായത്തോടെയാണം ക്യാപ്റ്റന് കോച്ചിനോട് സംസാരിക്കാൻ കഴിയേണ്ടത്. ഈ സംസാരം കാണികൾക്കും കേൾക്കാൻ സാധിക്കണം, വെട്ടോറി പറഞ്ഞു. 

മൂന്ന് ഫോർമാറ്റിലും ഇതുപോലൊരു മാറ്റം കൊണ്ടുവരണം. മികച്ച കളിക്ക് ഇത് സഹായിക്കും. ക്യാപ്റ്റനും പരിശീലകനും എന്താണ് ഈ സമയം ആലോചിക്കുന്നത് എന്ന് കാണികൾക്ക് അറിയാനാവണം എന്നും ഇഎസ്പിഎൻക്രിക്ഇൻഫോയിലെ ചർച്ചയ്ക്കിടയിൽ വെട്ടോറി പറഞ്ഞു.

കാണികളെ ഇവരുടെ സംസാരം കേൾക്കുന്നത് പല വിധത്തിൽ ​ഗുണം ചെയ്യുമെന്നും അദ്ദേഹം ചൂണ്ടിക്കാണിക്കുന്നു. സമ്മർദ ഘട്ടങ്ങളിലെ ഇവരുടെ ചർച്ച എന്തെന്ന് ആരാധകർ അറിയുന്നതോടെ നീക്കങ്ങൾ പിഴയ്ക്കുമ്പോഴുള്ള കുറ്റപ്പെടുത്തലുകളും പഴി ചാരലുകളും ഒഴിവാക്കാമെന്നും വെട്ടോറി അഭിപ്രായപ്പെട്ടു. 

പഞ്ചാബ് കിങ്സിന് എതിരെ ഫീൽഡ് ചെയ്യുന്ന സമയം കൊൽക്കത്ത ഡ​ഗൗട്ടിൽ 54 എന്ന നമ്പർ ഉയർന്നിരുന്നു. ഫീൽഡിലുള്ള ക്യാപ്റ്റൻ മോർ​ഗന് ഡ​ഗൗട്ടിൽ നിന്ന് നൽകിയ സന്ദേശങ്ങളിൽ ഒന്നാണ് ഇത്. എന്നാൽ 54 എന്നത് കൊണ്ട് എന്താണ് ഉദ്ദേശിച്ചത് എന്ന് കൊൽക്കത്ത നൈറ്റ്റൈഡേഴ്സ് വൃത്തങ്ങൾ ഇതുവരെ വ്യക്തമാക്കിയിട്ടില്ല.