ലണ്ടന്‍: ആഷസ് പരമ്പരയിലെ നാലാം ടെസ്റ്റില്‍ ഓസ്‌ട്രേലിയക്കെതിരെ ഇംഗ്ലണ്ടിന് ലീഡ്. രണ്ടാം ദിനം കളി നിര്‍ത്തുമ്പോള്‍ ഇംഗ്ലണ്ട് മികച്ച സ്‌കോറിലേക്ക് നീങ്ങുകയാണ്. നാല് വിക്കറ്റ് നഷ്ടത്തില്‍ 384 റണ്‍സെന്ന നിലയിലാണ് അവര്‍ ഒന്നാം ഇന്നിങ്‌സ് ബാറ്റിങ് തുടരുന്നത്.
ആദ്യം ബാറ്റ് ചെയ്ത ഓസ്‌ട്രേലിയയുടെ പോരാട്ടം 317 റണ്‍സില്‍ അവസാനിച്ചിരുന്നു. ആറ് വിക്കറ്റുകള്‍ ശേഷിക്കേ ഇംഗ്ലണ്ടിനു 67 റണ്‍സ് ലീഡ്.
ഓപ്പണര്‍ സാക് ക്രൗളിയുടെ കിടിലന്‍ സെഞ്ച്വറിയുടെ ബലത്തിലാണ് ഇംഗ്ലണ്ട് മികച്ച സ്‌കോറിലേക്ക് മുന്നേറിയത്. ബാസ്‌ബോള്‍ തന്ത്രത്തിന്റെ ഭാഗമായി താരം കൂറ്റന്‍ അടികളുമായി കളം നിറഞ്ഞു. 182 പന്തില്‍ 21 ഫോറും മൂന്ന് സിക്‌സും സഹിതം 189 റണ്‍സെടുത്തു. അര്‍ഹിച്ച അര്‍ധ സെഞ്ച്വറിയാണ് താരത്തിനു നഷ്ടമായത്.
തുടക്കത്തില്‍ തന്നെ ബെന്‍ ഡുക്കറ്റിനെ ഇംഗ്ലണ്ടിനു നഷ്ടമായെങ്കിലും പിന്നീടെത്തിയവര്‍ ക്രൗളിയെ കട്ടയ്ക്ക് പിന്തുണച്ചു. മൊയീന്‍ അലി (54), ജോ റൂട്ട് (84) എന്നിവര്‍ അര്‍ധ സെഞ്ച്വറി നേടി.
കളി നിര്‍ത്തുമ്പോള്‍ ക്യാപ്റ്റന്‍ ബെന്‍ സ്റ്റോക്‌സും ഹാരി ബ്രൂകുമാണ് ക്രീസില്‍. ഹാരി 14 റണ്‍സും ബെന്‍ സ്‌റ്റോക്‌സ് 24 റണ്‍സും എടുത്തു.
ടോസ് നേടി ഇംഗ്ലണ്ട് ബൗളിങ് തിരഞ്ഞെടുക്കുകയായിരുന്നു. ഓസ്‌ട്രേലിയയെ വലിയ സ്‌കോറിലെത്താന്‍ ഇംഗ്ലണ്ട് സമ്മതിച്ചില്ല.
മര്‍നെസ് ലബുഷെയ്ന്‍, മിച്ചല്‍ മാര്‍ഷ് എന്നിവര്‍ അര്‍ധ സെഞ്ചറി നേടി. ഇരുവരും 51 റണ്‍സ് വീതമെടുത്തു. ട്രാവിസ് ഹെഡ് (48), സ്റ്റീവ് സ്മിത്ത് (41), ഡേവിഡ് വാര്‍ണര്‍ (32) എന്നിവരും മികവോടെ തുടങ്ങി. എന്നാല്‍ അധികം ആയുസുണ്ടായില്ല.
വാലറ്റത്ത് മിച്ചല്‍ സ്റ്റാര്‍ക്ക് 36 റണ്‍സുമായി പുറത്താകാതെ നിന്നു. ഉസ്മാന്‍ ഖവാജ മൂന്ന് റണ്‍സുമായി ക്ഷണം മടങ്ങി. അലക്സ് കാരി 20 റണ്‍സിലും കാമറൂണ്‍ ഗ്രീന്‍ 16 റണ്‍സുമായും മടങ്ങി. പാറ്റ് കമ്മിന്‍സ് ഒരു റണ്ണിലും ജോഷ് ഹെയ്‌സല്‍വുഡ് നാല് റണ്‍സും എടുത്തു പുറത്തായി.
ഇംഗ്ലണ്ടിനായി ക്രിസ് വോക്സ് അഞ്ച് വിക്കറ്റുകള്‍ വീഴ്ത്തി. സ്റ്റുവര്‍ട്ട് ബ്രോഡ് രണ്ട് വിക്കറ്റുകള്‍ സ്വന്തമാക്കി. ജെയിംസ് ആന്‍ഡേഴ്‌സന്‍, മാര്‍ക് വുഡ്, മൊയീന്‍ അലി എന്നിവര്‍ ഓരോ വിക്കറ്റെടുത്തു.
അഞ്ച് മത്സരങ്ങളടങ്ങിയ പരമ്പരയിലെ ആദ്യ രണ്ട് മത്സരങ്ങളും ജയിച്ച് ഓസ്ട്രേലിയ മുന്നിലെത്തി. എന്നാല്‍ മൂന്നാം ടെസ്റ്റില്‍ വിജയം പിടിച്ച് ഇംഗ്ലണ്ട് തിരിച്ചടിച്ചു. ഇതോടെ നാലാം പോരാട്ടം നിര്‍ണായകമായി.
ഈ വാര്‍ത്ത കൂടി വായിക്കൂ
ആദ്യം യശസ്വിയും രോഹിതും, പിന്നാലെ കോഹ്‌ലിക്കും അര്‍ധ സെഞ്ച്വറി; മികച്ച സ്‌കോറിനായി ഇന്ത്യ പൊരുതുന്നു
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates