​ഗ്ലാസ്കോ: 3-1ന് സ്കോട്ട്ലാൻഡിനെ തകർത്ത് യൂറോ കപ്പിന്റെ അവസാന 16ൽ ഇടംനേടി ക്രൊയേഷ്യ. തകർപ്പൻ ജയത്തോടെ ​ഗ്രൂപ്പ് ഡിയിൽ‌ രണ്ടാം സ്ഥാനത്തേക്ക് കയറിയാണ് ക്രൊയേഷ്യ പ്രീക്വാർട്ടർ ഉറപ്പിച്ചത്. 

17ാം മിനിറ്റിൽ നികോളാസ് വ്ലാസിച്ചിലൂടെയാണ് ക്രൊയേഷ്യ ആദ്യ ​ഗോൾ നേടിയത്. എന്നാൽ 42ാം മിനിറ്റിൽ സ്കോട്ട്ലാൻഡ് സമനില പിടിച്ചു. ജയം അനിവാര്യമായ കളിയിൽ 62ാം മിനിറ്റിൽ തങ്ങളുടെ സൂപ്പർ താരം ലൂക്കാ മോഡ്രിച്ചിലൂടെ അവർ ലീഡ് കണ്ടെത്തി. യൂറോ 2020ലെ ഏറ്റവും മികച്ച ​ഗോളെന്ന് വിശേഷിപ്പിക്കപ്പെടാവുന്ന ഷോട്ടാണ് അവിടെ മോഡ്രിച്ചിൽ നിന്ന് വന്നത്. 

77ാം മിനിറ്റിൽ ഇവാൻ പെരിസിച്ചിലൂടെ ക്രൊയേഷ്യ ലീഡ് 3-1 ആയി ഉയർത്തി. കോർണർ കിക്കിൽ നിന്നായിരുന്നു ഈ ​ഗോൾ. പ്രീക്വാർട്ടറിൽ ​ഗ്രൂപ്പ് ഇയിലെ രണ്ടാം സ്ഥാനക്കാരെയാണ് ക്രൊയേഷ്യ നേരിടുക. സ്കോട്ട്ലാൻഡ് ടൂർണമെന്റിൽ നിന്ന് പുറത്തായി. മൂന്നാം സ്ഥാനക്കാരായി പ്രീക്വാർട്ടർ എന്ന ചെക്ക് റിപ്പബ്ലിക്കിന്റെ സ്വപ്നം അവസാനിച്ചിട്ടില്ല. 

മറ്റൊരു കളിയിൽ ചെക്ക് റിപ്പബ്ലിക്കിനെ എതിരില്ലാത്ത ഒരു ​ഗോളിന് തകർത്ത് ഇം​ഗ്ലണ്ട് ​ഗ്രൂപ്പ് ചാമ്പ്യന്മാരായി പ്രീക്വാർട്ടറിലേക്ക് കടന്നു.സ്റ്റെർലിങ് ആണ് ഇം​ഗ്ലണ്ടിനായി ​ഗോൾ നേടിയത്. 12ാം മിനിറ്റിൽ ​ഗ്രീലിഷിന്റെ ക്രോസിൽ ഹെഡറിലൂടെയാണ് സ്റ്റെർലിങ് ​ഗോൾ നേടിയത്. ​ഗ്രൂപ്പ് എഫിലെ രണ്ടാം സ്ഥാനക്കാരെയാണ് പ്രീക്വാർട്ടറിൽ ഇം​ഗ്ലണ്ട് നേരിടുക. 

മ​ഗ്വയറും ഹെൻഡേഴ്സനും കളിയിൽ നിറഞ്ഞപ്പോൾ ഓൺ ടാർ​ഗറ്റിലേക്ക് ഹാരി കെയ്നിന്റെ ഷോട്ട് എത്തിയതും ഇം​ഗ്ലണ്ടിന് ആശ്വാസമാവുന്നു. കഴിഞ്ഞ കളികളിലെല്ലാം ഫോം കണ്ടെത്താനാവാതെ കെയ്ൻ വലഞ്ഞത് ഇം​ഗ്ലണ്ടിന് തലവേദനയായിരുന്നു. ​ഗ്രൂപ്പ് ഘട്ടത്തിൽ ഒരു ​ഗോൾ പോലും വഴങ്ങാതെയാണ് അടുത്ത ഘട്ടത്തിലേക്ക് കടക്കുന്നതെന്നത് ഇം​ഗ്ലണ്ടിന്റെ ആത്മവിശ്വാസം ഉയർത്തും.