ലണ്ടന്‍: വിംബിള്‍ഡൺ വനിതാ സിം​ഗിൾസ് കിരീടത്തിൽ മുത്തമിട്ട് കസാഖിസ്ഥാന്റെ എലെന റെബാക്കിന. വിംബിൾഡണിൽ പുതിയ ചരിത്രം എഴുതി ചേർത്താണ് താരത്തിന്റെ കിരീട നേട്ടം. ഗ്രാന്‍ഡ്സ്ലാം കിരീടം നേടുന്ന ആദ്യ കസാഖിസ്ഥാന്‍ താരമെന്ന ഒരിക്കലും മായ്ക്കാൻ സാധിക്കാത്ത അപൂർവ നേട്ടമാണ് 23കാരി കിരീടത്തോടൊപ്പം തുന്നിച്ചേർത്തത്. 

വനിതാ സിംഗിള്‍സ് ഫൈനലില്‍ ടുണീഷ്യയുടെ ഒന്‍സ് ജാബിയൂറിനെ തകർത്താണ് താരം ചാമ്പ്യൻ പട്ടം സ്വന്തമാക്കിയത്. കരിയറിലെ കന്നി ​​ഗ്രാൻഡ് സ്ലാം കിരീടത്തിലേക്ക് ആദ്യ സെറ്റ് വഴങ്ങിയ ശേഷം പൊരുതിക്കയറിയാണ് താരം എത്തിയത്. സ്കോര്‍: 3-6, 6-2, 6-2.

റണ്ണറപ്പായ ഒന്‍സ് ജാബിയൂറും ഒരു അപൂർവ നേട്ടത്തിന് ഉടമയായി. ആധുനിക ടെന്നീസിൽ ഒരു ഗ്രാന്‍ഡ്സ്ലാമിന്റെ ഫൈനലിലെത്തുന്ന ആദ്യ ആഫ്രിക്കന്‍ വനിതയെന്ന നേട്ടം സ്വന്തമാക്കിയാണ് ടുണീഷ്യയുടെ ജാബിയൂര്‍ സെന്റര്‍ കോര്‍ട്ടില്‍ നിന്ന് മടങ്ങിയത്.

ഫൈനലില്‍ കടുത്ത പോരാട്ടത്തിനാണ് സെന്റര്‍ കോര്‍ട്ട് സാക്ഷ്യം വഹിച്ചത്. മൂന്നാം സീഡ് ജാബിയൂര്‍ തുടക്കത്തില്‍ തന്നെ മികച്ച പ്രകടനമാണ് പുറത്തെടുത്തത്. ആദ്യ സെറ്റ് 6-3 ന് ജാബിയൂര്‍ സ്വന്തമാക്കി. എന്നാല്‍ റെബാക്കിനയുടെ അവിശ്വസനീയ തിരിച്ചുവരവാണ് പിന്നീട് കണ്ടത്. രണ്ടാം സെറ്റ് 6-2 ന് സ്വന്തമാക്കി താരം തിരിച്ചടിച്ചു. മൂന്നാം സെറ്റിലും 6-2 ന് വിജയിച്ച് റെബാക്കിന ടെന്നീസ് ചരിത്രത്തിൽ പുതിയ കൈയൊപ്പു ചാർത്തി. 

ഈ വാര്‍ത്ത കൂടി വായിക്കാം  

'കിരീടങ്ങളല്ല, സന്തോഷമാണ് എനിക്ക് പ്രധാനം'; വിംബിള്‍ഡണ്‍ സെമിയിലെ പിന്മാറ്റത്തില്‍ നദാല്‍

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ