ലണ്ടന്: മൂന്നാം ടെസ്റ്റിൽ രണ്ടാം ഇന്നിങ്സില് ഇംഗ്ലണ്ടിന്റെ 4 വിക്കറ്റുകള് 100 റൺസിനു മുൻപ് വീഴ്ത്തി ഇന്ത്യ. നാലാം ദിനം ഒന്നാം സെഷനില് ഓപ്പണര് ബെന് ഡക്കറ്റിനെ പുറത്താക്കി മുഹമ്മദ് സിറാജാണ് വിക്കറ്റ് വേട്ട തുടങ്ങിയത്. പിന്നാലെ മൂന്നാമന് ഒലി പോപ്പിനേയും സിറാജ് മടക്കി. മികച്ച രീതിയില് മുന്നോട്ടു പോയ ഓപ്പണ് സാക് ക്രൗളിയെ വീഴ്ത്തി നിതീഷ് കുമാര് റെഡ്ഡിയും ഇംഗ്ലണ്ടിനു പ്രഹരമേല്പ്പിച്ചു. ഹാരി ബ്രൂക്ക് പ്രത്യാക്രമണത്തിലേക്ക് കടന്നപ്പോഴാണ് ആകാശ് ദീപിന്റെ നിര്ണായക സ്ട്രൈക്ക്.
ഹാരി ബ്രൂക്ക് ഇന്ത്യയെ കടന്നാക്രമിക്കാന് തുടങ്ങിയപ്പോഴാണ് ആകാശ് താരത്തെ ക്ലീന് ബൗള്ഡാക്കിയത്. 4 ഫോറും ഒരു സിക്സും സഹിതം 19 പന്തില് 23 റണ്സുമായി നില്ക്കുമ്പോഴാണ് ബ്രൂക്കിന്റെ വീഴ്ച.
നിലവില് ഇംഗ്ലണ്ട് 4 വിക്കറ്റ് നഷ്ടത്തില് 87 റണ്സെന്ന നിലയിലാണ്. 16 റണ്സുമായി ജോ റൂട്ടും റണ്ണൊന്നുമെടുക്കാതെ ക്യാപ്റ്റന് ബെന് സ്റ്റോക്സുമാണ് ക്രീസില്.
വിക്കറ്റ് നഷ്ടമില്ലാതെ 2 റണ്സ് എന്ന നിലയില് നാലാം ദിനം തുടങ്ങിയ ഇംഗ്ലണ്ടിനു സ്കോര് 22 ല് എത്തിയപ്പോഴാണ് ഡക്കറ്റിനെ നഷ്ടമായത്. താര 12 റണ്സെടുത്തു. പിന്നാലെ ഒലി പോപ്പും മടങ്ങി. താരം 4 റണ്സില് പുറത്തായി. സാക് ക്രൗളി 22 റണ്സിലും വീണു. സ്കോര് 50ല് എത്തുമ്പോഴേക്കും മൂന്ന് പേര് കൂടാരം കയറി. പിന്നാലെ ഇംഗ്ലണ്ടിനെ കരകയറ്റാനുള്ള ദൗത്യവുമായി എത്തിയ ബ്രൂക്ക് ഒന്നാളിയെങ്കിലും പെട്ടെന്നു കത്തി തീര്ന്നു.
നേരത്തെ ഇംഗ്ലണ്ടിന്റെ ഒന്നാം ഇന്നിങ്സ് 387 റണ്സില് അവസാനിപ്പിച്ച ഇന്ത്യയും ഒന്നാം ഇന്നിങ്സില് ഇതേ സ്കോറിലാണ് നിന്നത്. ഇന്ത്യക്കായി കെഎല് രാഹുല് സെഞ്ച്വറി നേടി. ഋഷഭ് പന്ത്, രവീന്ദ്ര ജഡേജ എന്നിവര് അര്ധ സെഞ്ച്വറിയും കണ്ടെത്തി. ഒന്നാം ഇന്നിങ്സില് ഇംഗ്ലണ്ടിന്റെ 5 വിക്കറ്റുകള് വീഴ്ത്തി ജസ്പ്രിത് ബുംറ ഇന്ത്യന് ബൗളര്മാരില് തിളങ്ങി.
രാഹുല് 100 റണ്സെടുത്തു മടങ്ങി. താരത്തിന്റെ പത്താം ടെസ്റ്റ് സെഞ്ച്വറിയാണിത്. പന്ത് 74 റണ്സും കത്തും ഫോമില് ബാറ്റ് വീശുന്ന രവീന്ദ്ര ജഡേജ 72 റണ്സും അടിച്ചെടുത്തു. കരുണ് നായര് 40 റണ്സും നിതീഷ് കുമാര് 30 റണ്സും എടുത്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates