ലണ്ടൻ: ഇം​ഗ്ലണ്ടിനെതിരായ ടെസ്റ്റ് പരമ്പരയിൽ അംപയർമാർ ആതിഥേയരായ ഇം​ഗ്ലണ്ടിനു അനുകൂലമായി തീരുമാനങ്ങൾ എടുക്കുന്നതായി ഇന്ത്യയുടെ പരാതി. ഇതുമായി ബന്ധപ്പെട്ട് ടീം ഇന്ത്യ മാച്ച് റഫറിക്ക് ഔദ്യോ​ഗിക പരാതി നൽകിയതായി റിപ്പോർട്ടുകൾ. പന്ത് മാറ്റുന്നതുമായി ബന്ധപ്പെട്ട് ഇന്ത്യയോടും ഇം​ഗ്ലണ്ടിനോടും രണ്ട് സമീപനമാണ് അംപയർമാർക്കുണ്ടായിരുന്നത്. മൂന്നാം ടെസ്റ്റിൽ പന്ത് മാറ്റുന്ന കാര്യത്തിൽ അംപയർമാർ കൈക്കൊണ്ട നിലപാട് മത്സരഫലം ഇം​ഗ്ലണ്ടിനു അനുകൂലമാകുന്നതിനു കാരണമായെന്നും ഇന്ത്യ പരാതിയിൽ ആക്ഷേപിക്കുന്നു.

പന്ത് മാറ്റുന്നതിൽ കൃത്യമായ ചട്ടം നിലവിലുണ്ട്. എന്നാൽ ഇക്കാര്യങ്ങളൊന്നും ഇം​ഗ്ലണ്ടിന്റെ കാര്യത്തിൽ അംപയർമാർ നടപ്പാക്കിയിട്ടില്ല.

മൂന്നാം ടെസ്റ്റിൽ ഇം​ഗ്ലണ്ട് ബാറ്റിങിന്റെ ഒന്നാം ഇന്നിങ്സിൽ രണ്ടാം ന്യൂബോളിന് 10 ഓവർ പിന്നിടും മുൻപേ തകരാറുണ്ടെന്നു ഇന്ത്യൻ ക്യാപ്റ്റൻ ശുഭ്മാൻ ​ഗില്ലും പേസർ മുഹമ്മദ് സിറാജും അംപയർമാരെ അറിയിച്ചിരുന്നു. മാറ്റുന്ന പന്തിന്റെ അതേ അവസ്ഥയിലുള്ള പന്താണ് പകരം നൽകേണ്ടത് എന്നാണ് ചട്ടം. എന്നാൽ ഇന്ത്യയ്ക്ക് പകരം എറിയാൻ കിട്ടിയതാകട്ടെ 30- 35 ഓവർ എറിഞ്ഞ പഴകിയ പന്താണ്. 10ാം ഓവറിൽ മാറ്റിയ പന്തിനു പകരമാണ് അത്രയും പഴകിയ പന്ത് ഇന്ത്യക്ക് നൽകിയത്.

മൂന്നാം ടെസ്റ്റിൽ ജസ്പ്രിത് ബുംറയുടെ നേതൃത്വത്തിൽ ഇന്ത്യ മികച്ച രീതിയിൽ മുന്നോട്ടു പോകുന്നതിനിടെയാണ് ഈ പന്ത് മാറ്റം. 300 എത്തും മുൻപ് 7 വിക്കറ്റുകൾ നഷ്ടമായ ഇം​ഗ്ലണ്ട് പിന്നീട് വലിയ തോതിൽ തിരിച്ചടിക്കുന്നതാണ് കണ്ടത്. മാറ്റി നൽകിയ പന്തിന്റെ പഴക്കം ഏറിയത് ഇം​ഗ്ലണ്ടിന് അനുകൂലമായി മാറിയെന്നും ഇന്ത്യക്ക് അതു തിരിച്ചടിയായെന്നും പരാതിയിൽ ചൂണ്ടിക്കാട്ടുന്നു.