മാഞ്ചെസ്റ്റര്: ഇംഗ്ലണ്ടുമായുള്ള നാലാം ടെസ്റ്റില് ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ ആദ്യ ദിനം കളി അവസാനിക്കുമ്പോള് 265/4 എന്ന നിലയില്. 19 റണ്സ് വീതമെടുത്ത് രവീന്ദ്ര ജഡേജയും ശാര്ദുല് താക്കൂറുമാണ് ക്രീസില്. കെഎല് രാഹുല്, യശസ്വി ജയ്സ്വാള്, ക്യാപ്റ്റന് ശുഭ്മാന് ഗില്, സായ് സുദര്ശന് എന്നിവരുടെ വിക്കറ്റുകളാണ് ഇന്ത്യയ്ക്ക് നഷ്ടമായത്. ഇതിനിടെ ഋഷഭ് പന്ത് കാലിന് പരിക്കേറ്റ് റിട്ടയേര്ഡ് ഹര്ട്ടായതും ഇന്ത്യയ്ക്ക് തിരിച്ചടിയായി. ഇംഗ്ലണ്ടിനായി ക്യാപ്റ്റന് ബെന് സ്റ്റോക്സ് രണ്ട് വിക്കറ്റുകള് വീഴ്ത്തി, ക്രിസ് വോക്സും ബ്രാണ്ടന് കാര്സുമാണ് മറ്റു രണ്ട് വിക്കറ്റുകള് വീഴ്ത്തിയത്.
ഒന്നാം ദിനം ആദ്യ സെഷനില് മികച്ച തുടക്കമിട്ട ഇന്ത്യയ്ക്ക് പിന്നീടുള്ള രണ്ട് സെഷനുകളിലും തിരിച്ചടിയേറ്റു. ഓപ്പണര്മാരായ രാഹുലും ജയ്സ്വാളും വിക്കറ്റ് നഷ്ടമില്ലാതെ ആദ്യ സെഷന് പൂര്ത്തിയാക്കി. പിന്നാലെ 98 പന്തില് നിന്ന് 46 റണ്സെടുത്ത രാഹുലിന്റെ വിക്കറ്റാണ് ഇന്ത്യയ്ക്ക് ആദ്യം നഷ്ടമായത്. ക്രിസ് വോക്സ് ആണ് ഇംഗ്ലണ്ടിന് ബ്രേക്ക് ത്രൂ നല്കിയത്. പിന്നാലെയെത്തിയ സായി സുദര്ശനുമായി ചേര്ന്ന് ബാറ്റിങ് തുടര്ന്ന ജയ്സ്വാള് ഇന്ത്യന് സ്കോര് മുന്നിലേക്ക് നീക്കി. അര്ധശതകം പൂര്ത്തിയാക്കിയയുടനെ ജയ്സ്വാളിനെ ലിയാം ഡൗസന് മടക്കിയയച്ചു. 107 പന്തില് നിന്ന് 10 ബൗണ്ടറിയടക്കം 58 റണ്സായിരുന്നു ജയ്സ്വാളിന്റെ സമ്പാദ്യം. പിന്നാലെയിറങ്ങിയ ക്യാപ്റ്റന് ശുഭ്മാണ് ഗില്ലിന് കാര്യമായ സംഭവനയൊന്നും നല്കാനായില്ല. 23 പന്തില് 12 റണ്സുമായി നില്ക്കേ ഗില്ലിനെ ഇംഗ്ലണ്ട് ക്യാപ്റ്റന് ബെന് സ്റ്റോക്ക്സാണ് പുറത്താക്കിയത്.
നാലാം വിക്കറ്റില് ഒന്നിച്ച സായ് സുദര്ശന് - ഋഷഭ് പന്ത് സഖ്യം ഇന്ത്യന് ഇന്നിങ്സ് മുന്നോട്ടുനയിച്ചു. അതിനിടെ ക്രിസ് വോക്സിന്റെ പന്തില് റിവേഴ്സ് സ്വീപ്പിന് ശ്രമിച്ച് പന്തിന്റെ കാലിന് പരിക്കേറ്റു. കാലില് നിന്ന് ചോരപൊടിയുന്നുമുണ്ടായിരുന്നു. കാല് നിലത്തുകുത്താന് പോലും സാധിക്കാത്ത അവസ്ഥയിലായിരുന്നു പന്ത്. തുടര്ന്ന് സ്റ്റേഡിയത്തിലെ ബഗ്ഗി ആംബുലന്സ് എത്തിയാണ് പന്തിനെ പുറത്തേക്ക് കൊണ്ടുപോയത്. 48 പന്തില് നിന്ന് 37 റണ്സെടുത്തുനില്ക്കേ പന്ത് റിട്ടയേര്ഡ് ഹര്ട്ടായി മടങ്ങുകയായിരുന്നു. പിന്നാലെ സായി സുദര്ശന് തന്റെ ടെസ്റ്റ് ക്രിക്കറ്റിലെ ആദ്യ അര്ദ്ധ ശതകം കുറിച്ചു. 61 റണ്സില് നില്ക്കേ ക്യാപ്റ്റന് ബെന് സ്റ്റോക്സിന്റെ പന്തില് സുദര്ശന് മടങ്ങുമ്പോള് ഇന്ത്യന് സ്കോര്ബോര്ഡില് 235 റണ്സായിരുന്നു. വെളിച്ച കുറവ് മൂലം ആദ്യനിദം നേരത്തെ കാളി അവസാനിപ്പിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates