ലിസ്ബൻ: മുൻ ഓസ്ട്രേലിയൻ താരം മോയിസസ് ഹെൻ‍റിക്കസ് തന്റെ കന്നി അന്താരാഷ്ട്ര സെഞ്ച്വറി 39ാം വയസിൽ സ്വന്തമാക്കി. അതും പോർച്ചു​ഗൽ ജേഴ്സിയിൽ! ജന്മ രാജ്യത്തേക്ക് മാറി കളിക്കാനിറങ്ങിയ താരം പോർച്ചു​ഗലിനായി മൂന്നാം അന്താരാഷ്ട്ര പോരാട്ടത്തിൽ തന്നെ സെഞ്ച്വറി നേടി എന്ന സവിശേഷതയുമുണ്ട്.

ടി20 ലോകകപ്പ് യൂറോപ്യൻ യോ​ഗ്യതാ പോരാട്ടത്തിൽ ചെക്ക് റിപ്പബ്ലിക്കിനെതിരെ 51 പന്തിൽ 12 ഫോറും 7 സിക്സും സഹിതം ഹെൻ‍റിക്കസ് 111 റൺസ് അടിച്ചുകൂട്ടി. മത്സരത്തിന്റെ ആദ്യ പന്തിൽ തന്നെ പോർച്ചു​ഗലിനു വിക്കറ്റ് നഷ്ടമായി. വൺ ഡൗണായാണ് പരിചയസമ്പന്നനായ ഓൾ റൗണ്ടർ ക്രീസിലെത്തിയത്. തുടക്കം മുതൽ താരം ചെക്ക് ബൗളിങിനെ കടന്നാക്രമിച്ചു. ഇടയ്ക്ക് മഴ കളി തടസപ്പെടുത്തി. എന്നാൽ അപ്പോഴേക്കും ഹെൻ‍റിക്കസിന്റെ കരുത്തിൽ പോർച്ചു​ഗൽ മഴയ്ക്ക് മുൻപ് 6 വിക്കറ്റ് നഷ്ടത്തിൽ 211 റൺസിലെത്തി. ഇതോടെ ഡെക് വർത്ത് ലൂയീസ് നിയമം അനുസരിച്ച് പോർച്ചു​ഗൽ 91 റൺസ് വിജയം ആഘോഷിച്ചു. അവരുടെ ലോകകപ്പ് പ്രതീക്ഷകളും സജീവമായി.

ഓസ്ട്രേലിയക്കായി ടെസ്റ്റ്, ഏകദിനം, ടി20 പോരാട്ടങ്ങളിലായി 44 മത്സരങ്ങൾ മോയിസസ് ഹെൻ‍റിക്കസ് കളിച്ചിട്ടുണ്ട്. എന്നാൽ ഒരു ഫോർമാറ്റിലും താരം ഓസീസിനായി സെഞ്ച്വറി നേടിയിട്ടില്ല. പോർച്ചു​ഗലിൽ ജനിച്ച മോയിസസ് ഹെൻ‍റിക്കസ് അന്താരാഷ്ട്ര ക്രിക്കറ്റിൽ ഓസീസിനായാണ് ഇതുവരെ കളിച്ചത്. കഴിഞ്ഞ മാസമാണ് താരം ഓസ്ട്രേലിയൻ ക്രിക്കറ്റ് കരിയറിനു വിരാമമിട്ടത്. പിന്നാലെയാണ് പോർച്ചു​ഗൽ ടീമിന്റെ നായകനായുള്ള തിരിച്ചു വരവ്.

ക്രിമിനൽ കേസിൽ 22 വർഷം പ്രതി! മുൻ ഇന്ത്യൻ ക്രിക്കറ്റ് താരം ഒടുവിൽ 'കുറ്റവിമുക്തൻ'യോ​ഗ്യതാ പോരാട്ടത്തിൽ ഇതുവരെയായി താരം 178 റൺസ് അടിച്ചെടുത്തിട്ടുണ്ട്. ടൂർണമെന്റിൽ ഏറ്റവും കൂടുതൽ റൺസെടുത്ത താരവും ഹെൻ‍റിക്കസ് തന്നെ. 10 വർഷത്തോളം ഓസീസ് ടി20 ടീമിലടക്കം നിർണായകമായി നിന്ന താരം കൂടിയാണ് മോയിസസ് ഹെൻ‍റിക്കസ്.

യൂറോപ്യൻ യോ​ഗ്യതാ പോരാട്ടത്തിൽ തുടരെ നാല് മത്സരങ്ങളും ജയിച്ചാണ് നിലവിൽ പോർച്ചു​ഗൽ നിൽക്കുന്നത്. അപരാജിതരായി റെക്കോർഡുകൾ തകർത്ത് മുന്നേറുന്ന സ്പെയിനുമായാണ് പോർച്ചു​ഗലിന്റെ അടുത്ത പോരാട്ടം. ഈ മത്സരത്തിലെ വിജയികൾ 2028ലെ ഐസിസി ടി20 ലോകകപ്പ് യോ​ഗ്യതയ്ക്കായുള്ള റീജ്യനൽ ഫൈനലിലേക്ക് മുന്നേറും.