ഹൂസ്റ്റൺ: ജപ്പാനെതിരെ ഫിഫ ലോകകപ്പ് റൗണ്ട് ഓഫ് 32ൽ ത്രസിപ്പിക്കുന്ന ജയം സ്വന്തമാക്കിയ ബ്രസീലിനായി തിളങ്ങിയ താരങ്ങളിൽ ഒരാൽ ബ്രൂണോ ​ഗ്വിമാരെസായിരുന്നു. ഒരു ​ഗോളിനു പിന്നിൽ നിന്ന ശേഷം കാസെമിറോ, ​ഗബ്രിയേൽ മാർട്ടിനെല്ലി എന്നിവരുടെ ​ഗോളിലൂടെ ബ്രസീൽ രണ്ടാം പകുതിയിൽ മത്സരം തിരികെ പിടിക്കുകയായിരുന്നു. അവരുടെ വിജയ ​ഗോൾ വന്നത് 90 മിനിറ്റിനു ശേഷമുള്ള ഇഞ്ച്വറി സമയത്താണ്. വിജയ ​ഗോളിനു വഴിയൊരുക്കിയ അസിസ്റ്റ് നൽകിയത് ​ഗ്വിമാരെസാണ്. താരത്തിന്റെ ഈ ലോകകപ്പിലെ നാലാമത്തെ അസിസ്റ്റാണിത്. 4 മത്സരങ്ങളിൽ നിന്നു 4 അസിസ്റ്റുകൾ.

ഇതോടെ താരം രണ്ട് നേട്ടങ്ങളുടെ പട്ടികയിലും ഇടം പിടിച്ചു. ഒരു ലോകകപ്പ് ടൂർണമെന്റിൽ ഏറ്റവും കൂടുതൽ അസിസ്റ്റുകൾ നൽകുന്ന താരമെന്ന ബ്രസീൽ ഇതിഹാസം സിക്കോയുടെ റെക്കോർഡിനൊപ്പമാണ് ​ഗ്വിമാരെസും എത്തിയത്. 44 വർഷത്തിനു ശേഷമാണ് ഒരു ബ്രസീൽ താരം സീക്കോയുടെ ഈ അപൂർവ റെക്കോർഡിനൊപ്പമെത്തിയത്. 44 വർഷക്കാലമായി മറ്റൊരു ബ്രസീലിയൻ ഫുട്ബോൾ താരത്തിനും സാധിക്കാത്ത ഒരു അപൂർവ നേട്ടമാണ് ന്യൂകാസിൽ യുനൈറ്റഡ് മധ്യനിര താരം സ്വന്തം പേരിലാക്കിയത്. സിക്കോ 1982ൽ സ്ഥാപിച്ച റെക്കോർഡിനൊപ്പമാണ് ​ഗ്വിമാരെസും പേരെഴുതി ചേർത്തത്.

ഫുട്ബോൾ ചരിത്രത്തിൽ ഇന്നേവരെ അണിനിരന്നിട്ടുള്ളതിൽ വെച്ച് ഏറ്റവും മികച്ച ടീമുകളിലൊന്നായാണ് 1982ലെ ബ്രസീൽ ടീം വിലയിരുത്തപ്പെടുന്നത്. അതിനു ശേഷം ബ്രസീലിന്റെ സെലക്കാവോ ജേഴ്സി അണിഞ്ഞ ലോകോത്തര താരങ്ങളിൽ ആർക്കും തന്നെ ഒരു ലോകകപ്പിൽ സിക്കോയുടെ ആ ക്രിയേറ്റീവ് മികവിനൊപ്പമെത്താൻ കഴിഞ്ഞിരുന്നില്ല.

21ാം നൂറ്റാണ്ടിലെ ഒരു ലോകകപ്പിൽ 4 അസിസ്റ്റുകൾ നൽകുന്ന ഇതിഹാസ താരങ്ങൾക്കൊപ്പവും ​ഗ്വിമാരെസ് തന്റെ പേരെഴുതി വച്ചു. മൈക്കൽ ബാലാക്ക് (ജർമനി 2002), ഫ്രാൻസെസ്കോ ടോട്ടി (ഇറ്റലി 2006), യുവാൻ ക്വഡ്രാഡോ (കൊളംബിയ 2014) എന്നിവരാണ് നേരത്തെ ഈ നൂറ്റണ്ടിൽ ഒറ്റ ലോകകപ്പ് എഡിഷനിൽ ഇത്രയും അസിസ്റ്റുകൾ നൽകിയ താരങ്ങൾ.

ഈ ലോകകപ്പിലും ഇതുവരെയുള്ള കളികളിൽ ഏറ്റവും കൂടുതൽ അസിസ്റ്റ് നൽകിയ താരങ്ങളിൽ ഒന്നാം സ്ഥാനത്തും ​ഗ്വിമാരെസാണ്. ജർമനിയുടെ ഫ്ലോറിയൻ വിയറ്റ്സ്, ഫ്രാൻസിന്റെ മൈക്കൽ ഒലീസെ, സ്വീഡന്റെ അലക്സാണ്ടർ ഇസാക്ക് (എല്ലാവർക്കും മൂന്ന് അസിസ്റ്റുകൾ വീതം) എന്നിവരെ മറികടന്നാണ് ​ഗ്വിമാരെസ് ഒന്നാമത് നിൽക്കുന്നത്.

ബ്രസീലിന്റെ എട്ടാം നമ്പർ ജേഴ്സി അണിയുന്ന ഈ 28 കാരന്റെ നിർണായക സംഭാവനകൾ ഗ്രൂപ്പ് ഘട്ടം മുതൽക്കേ പ്രകടമായിരുന്നു. മൊറോക്കോയ്‌ക്കെതിരെ ടൂർണമെന്റിലെ ആദ്യ മത്സരത്തിൽ വിനീഷ്യസ് ജൂനിയറിന് ഗോൾ നേടാൻ ​ഗ്വിമാരെസാണ് വഴിയൊരുക്കിയത്. സ്കോട്ലൻഡിനെതിരായ രണ്ടാം മത്സരത്തിൽ വിനീഷ്യസ് ജൂനിയറിനും മാത്യൂസ് കുന്യയ്ക്കും ഗോളടിക്കാൻ പാസുകൾ നൽകിയത് ​ഗ്വിമാരെസ് തന്നെ. പിന്നാലെയാണ് ജപ്പാനെതിരെയുള്ള വിജയ ​ഗോളിലേക്കുള്ള ​ഗോൾ വഴിയൊരുക്കൽ.

ജപ്പാനെതിരെയുള്ള മത്സരത്തിന്റെ ഇഞ്ച്വറി ടൈമിൽ, ജാപ്പനീസ് പ്രതിരോധ ഭടന്മാർ തടിച്ചുകൂടിയ പെനാൽറ്റി ബോക്സിനുള്ളിലേക്ക് മാർട്ടിനെല്ലിയെ കൃത്യമായി കണ്ടെത്തുന്നതിൽ ​ഗ്വിമാരെസ് കാണിച്ച ശാന്തതയും മികവും എടുത്തു പറയേണ്ടതാണ്. സമ്മർദ്ദ ഘട്ടത്തിൽ അദ്ദേഹം നൽകിയ ആ മാന്ത്രിക പാസാണ് ബ്രസീലിന് പ്രീ ക്വാർട്ടറിലേക്കുള്ള വഴി തുറന്നത്.