ഓസ്‍ലോ: ഫിഫ ലോകകപ്പിൽ ക്വാർട്ടർ ഫൈനലിൽ ഇം​ഗ്ലണ്ടിനോട് പരാജയപ്പെട്ട് പുറത്തായെങ്കിലും നോർവേ സൂപ്പർ സ്‌ട്രൈക്കർ എർലിങ് ഹാളണ്ട് ജന്മനാട്ടിലേക്ക് മടങ്ങിയെത്തിയതും വൻ വാർത്താ പ്രാധാന്യം നേടി. അമേരിക്കയിൽ നിന്നു മടങ്ങുമ്പോൾ ഹാളണ്ട് കൂടെക്കൂട്ടിയ തികച്ചും വിചിത്രമായ ഒരു യാത്രക്കാരനാണ് ആരാധകരെ അദ്ഭുതപ്പെടുത്തിയത്. തിങ്കളാഴ്ച നോർവേ ടീമിന്റെ വിമാനം ഓസ്‌ലോയിലെ ഗാർഡർമോൻ വിമാനത്താവളത്തിലിറങ്ങിയപ്പോൾ ഹാളണ്ടിന്റെ കൈയിലിരുന്ന ആ വസ്തു കണ്ട് ആരാധകർ ഒരു നിമിഷം ഞെട്ടി. റെഡ് കാർപെറ്റിലൂടെ നടന്നുനീങ്ങിയ ഹാളണ്ട് ഒരു കൈയിൽ മദ്യം സൂക്ഷിക്കുന്ന വിസ്കി കുപ്പിയും പിടിച്ച് നിൽക്കുന്ന ഏകദേശം 750 യുഎസ് ഡോളർ (ഏകദേശം 62,000 രൂപ) വില വരുന്ന ഒരു റാക്കൂണിന്റെ സ്റ്റഫ് ചെയ്ത രൂപം നെഞ്ചോട് ചേർത്തുപിടിച്ചിട്ടുണ്ടായിരുന്നു.

വിമാനത്താവളത്തിൽ ഇറങ്ങുന്നതിന്റെ ചിത്രങ്ങൾ ഹാളണ്ട് സോഷ്യൽ മീഡിയയിൽ പങ്കുവെക്കുകയും ചെയ്തു. ഏറെ രസകരമായ രീതിയിൽ 'ഇത് എന്നെ പിന്തുടർന്ന് വീട്ടിലേക്ക് പോന്നതാണ്' എന്ന രസകരമായ അടിക്കുറിപ്പോടെയാണ് താരം ചിത്രങ്ങൾ പോസ്റ്റ് ചെയ്തത്.

കഥ ഇങ്ങനെ...

കഥ തുടങ്ങുന്നത് ജൂലൈ ആദ്യവാരം നോർവേ ടീം ടെക്സാസിൽ ആയിരുന്നപ്പോഴാണ്. ലോകകപ്പ് മത്സരങ്ങൾക്കിടയിലെ ഇടവേളയിൽ ഹാളണ്ട് ഡാലസിലെ പ്രശസ്തമായ 'വൈൽഡ് ബിൽസ് വെസ്റ്റേൺ സ്റ്റോർ' സന്ദർശിച്ചിരുന്നു. അമേരിക്കൻ സതേൺ സംസ്‌കാരം പൂർണമായും ഉൾക്കൊണ്ട് താരം അവിടെ നിന്ന് ഒരു കറുത്ത കൗബോയ് തൊപ്പിയും ലെതർ ബൂട്സുകളും ഒരു ടി ഷർട്ടും വാങ്ങി. കടയിലൂടെ ചുറ്റിക്കറങ്ങുന്നതിനിടയിലാണ് അവിടെയുണ്ടായിരുന്ന വിചിത്രമായ സ്റ്റഫ് ചെയ്ത മൃഗങ്ങളുടെ രൂപങ്ങൾ ഹാളണ്ടിന്റെ ശ്രദ്ധയിൽപ്പെടുന്നത്. അങ്ങനെയാണ് മദ്യക്കുപ്പി പിടിച്ചു നിൽക്കുന്ന രീതിയിൽ രൂപകൽപ്പന ചെയ്ത ആളുകൾക്കിടയിൽ 'വിസ്കി റാക്കൂൺ' എന്ന് വിളിക്കപ്പെടുന്ന സ്റ്റഫ് ചെയ്ത റാക്കൂണിനെ താരം സ്വന്തമാക്കിയത്.

ലോകപ്രശസ്തനായ ഒരു താരം തങ്ങളുടെ കട സന്ദർശിച്ചതിന്റെ സന്തോഷത്തിൽ കടയുടമകൾ ഹാളണ്ടിന്റെ ചിത്രം വെബ്‌സൈറ്റിന്റെ ഹോം പേജിൽ തന്നെ പോസ്റ്റ് ചെയ്തു. ഇതോടെയാണ് 'ഹാളണ്ട് ഇഫക്റ്റ്' ആരംഭിച്ചത്. ഓൺലൈനിലൂടെ ആ 750 ഡോളറിന്റെ റാക്കൂൺ രൂപങ്ങൾ നിമിഷനേരം കൊണ്ട് വിറ്റുതീർന്നു. ലോകമെമ്പാടുമുള്ള ആരാധകരിൽ നിന്ന് ഓർഡറുകൾ പ്രവഹിച്ചതോടെ കടയുടമകൾക്ക് അന്താരാഷ്ട്ര ഷിപ്പിങ് സൗകര്യങ്ങൾ വരെ വേഗത്തിലാക്കേണ്ടി വന്നു.

നോർവേയുടെ ചരിത്ര മുന്നേറ്റം

ഈ ലോകകപ്പിൽ നോർവേ ടീമും ഹാളണ്ടും കാഴ്ചവെച്ച തകർപ്പൻ പ്രകടനത്തിന്റെ ഓർമ്മയ്ക്കായി ഇങ്ങനെയൊരു സമ്മാനം അദ്ദേഹം തീർച്ചയായും അർഹിക്കുന്നുണ്ട്. ലോകകപ്പ് ചരിത്രത്തിലാദ്യമായിട്ടാണ് നോർവേ ക്വാർട്ടർ ഫൈനൽ വരെയെത്തുന്നത്. പ്രീ ക്വാർട്ടറിൽ കരുത്തരായ ബ്രസീലിനെ അട്ടിമറിച്ചാണ് അവർ ഈ ചരിത്ര നേട്ടം സ്വന്തമാക്കിയത്.

ക്വാർട്ടർ ഫൈനലിൽ ഇംഗ്ലണ്ടിനോട് വിവാദപരമായ ചില തീരുമാനങ്ങൾക്കൊടുവിൽ 2-1 ന് പരാജയപ്പെട്ട് പുറത്തായെങ്കിലും ടൂർണമെന്റിലുടനീളം 7 ഗോളുകൾ നേടി ഹാളണ്ട് നോർവേയുടെ ടോപ്പ് സ്കോററായി തിളങ്ങി. വരാനിരിക്കുന്ന പ്രീമിയർ ലീഗ് സീസണിനായി ഹാളണ്ട് മാഞ്ചസ്റ്ററിലേക്ക് മടങ്ങുമ്പോൾ ഈ റാക്കൂണും കൂടെയുണ്ടാകുമോ എന്ന് വ്യക്തമല്ലെങ്കിലും ഈ ലോകകപ്പിലെ ഏറ്റവും പ്രശസ്തമായ ഒരു വിനോദ സ്മരണികയായി ഇത് മാറിക്കഴിഞ്ഞു.