ഫിഫ ലോകകപ്പിൽ ഇംഗ്ലണ്ടിനെതിരായ നിർണായക സെമി പോരാട്ടത്തിൽ നിലവിലെ ചാംപ്യൻമാരായ അർജന്റീന ഇറങ്ങുക നീല ജേഴ്സിയിൽ. പരമ്പരാഗതമായ ആകാശ നീലയും വെള്ളയും കലർന്ന വരകളുള്ള ജേഴ്സിക്ക് പകരം കടും നീല എവേ ജേഴ്സിയണിഞ്ഞായിരിക്കും ലയണൽ മെസിയും സംഘവും കളത്തിലിറങ്ങുക.
ഫിഫയുടെ ജേഴ്സി ചട്ടങ്ങളാണ് ഇതിന് പിന്നിലെ പ്രധാന കാരണം. എന്നാൽ അർജന്റീന ആരാധകർക്ക് ഈ നീല ജേഴ്സി കേവലമൊരു നിറത്തിനപ്പുറം വൈകാരികമായ ഒരുപാട് ഓർമകൾ സമ്മാനിക്കുന്ന ഒന്നാണ്. കാരണം ഇംഗ്ലണ്ടിനെതിരെയുള്ള രാജ്യത്തിന്റെ ചരിത്രത്തിലെ ഏറ്റവും പ്രശസ്തമായ രണ്ട് ലോകകപ്പ് വിജയങ്ങൾ പിറന്നത് ഈ നീല ജേഴ്സിയിലാണ് എന്നതു തന്നെ കാരണം.
അർജന്റീനയുടെ 'കബാല'
അർജന്റീനയുടെ കായിക സംസ്കാരത്തിൽ ഭാഗ്യത്തിലും അന്ധവിശ്വാസങ്ങളിലും ഉള്ള വിശ്വാസം (ഇതിനെയാണ് അവർ 'കബാല' എന്ന് വിളിക്കുന്നത്) വളരെ വലുതാണ്. ഇംഗ്ലണ്ടിനെതിരെയുള്ള മുൻകാലങ്ങളിലെ രണ്ട് ചരിത്ര പ്രധാനമായ ലോകകപ്പ് വിജയങ്ങൾ ഈ നീല ജേഴ്സി ധരിച്ചായിരുന്നു എന്നത് അർജന്റീനിയൻ ആരാധകരുടെ പ്രതീക്ഷകൾക്ക് ആക്കം കൂട്ടുന്നു.
1986ലെ ലോകകപ്പ് ക്വാർട്ടർ ഫൈനലിൽ ഡീഗോ മറഡോണ ചരിത്രപ്രസിദ്ധമായ 'ദൈവത്തിന്റെ കൈ' ഗോളും 'നൂറ്റാണ്ടിന്റെ ഗോളും' നേടി ഇംഗ്ലണ്ടിനെ 2-1 ന് തോൽപ്പിച്ച അവിസ്മരണീയ ദിനത്തിൽ അർജന്റീന നീല ജേഴ്സിയാണ് അണിഞ്ഞിരുന്നത്. 1998ലെ പ്രീ ക്വാർട്ടറിൽ അത്യന്തം നാടകീയമായ മത്സരത്തിൽ 2-2 സമനിലയ്ക്ക് ശേഷം പെനാൽറ്റി ഷൂട്ടൗട്ടിലൂടെ ഇംഗ്ലണ്ടിനെ അർജന്റീന പരാജയപ്പെടുത്തിയപ്പോഴും ഇതേ നീല ജേഴ്സി തന്നെയാണ് അവർ ധരിച്ചിരുന്നത്.
ഇംഗ്ലണ്ടിനെതിരെയുള്ള പഴയ ചരിത്രം ആവർത്തിക്കുമെന്ന പ്രതീക്ഷയിൽ ബുധനാഴ്ച നടക്കുന്ന മത്സരത്തിലും തങ്ങൾക്ക് നീല ജേഴ്സി വേണമെന്ന് അർജന്റീന പ്രത്യേകം ആവശ്യപ്പെട്ടതായി അർജന്റീന മാധ്യമങ്ങൾ റിപ്പോർട്ട് ചെയ്യുന്നു.
ഫിഫയുടെ നിയമങ്ങൾ
വിശ്വാസങ്ങൾക്കപ്പുറം ഫിഫയുടെ നിയമപരമായ ചില പ്രായോഗിക വശങ്ങളും ഈ തീരുമാനത്തിന് പിന്നിലുണ്ട്. സാധാരണയായി ടീമുകൾ അവരുടെ ഹോം ജേഴ്സി ധരിക്കാനാണ് ഫിഫ താത്പര്യപ്പെടുന്നത്. എന്നാൽ ഇരു ടീമുകളുടെയും ജേഴ്സി നിറങ്ങൾ തമ്മിൽ കൃത്യമായ വ്യത്യാസമില്ലെങ്കിൽ ഒരുകൂട്ടർക്ക് ഇതര ജേഴ്സി ധരിക്കാൻ ഫിഫ നിർദ്ദേശിക്കാറുണ്ട്.
ടെലിവിഷനിൽ കളി കാണുന്നവർക്കും പ്രത്യേകിച്ച് കാഴ്ച വെല്ലുവിളികൾ ഉള്ളവർക്കും ബുദ്ധിമുട്ടുണ്ടാകാതിരിക്കാൻ 'കടും നിറവും ഇളം നിറവും' എന്ന രീതിയിലാണ് ഫിഫ ജേഴ്സികൾ നിശ്ചയിക്കുന്നത്. ഈ ലോകകപ്പിൽ ഗ്രൂപ്പ് ഘട്ടത്തിൽ ജോർദാനെതിരെ 3-1 ന് വിജയിച്ച മത്സരത്തിൽ മാത്രമാണ് അർജന്റീന ഇതിനുമുമ്പ് നീല ജേഴ്സി ധരിച്ചിട്ടുള്ളത്. ബാക്കി മത്സരങ്ങളിലെല്ലാം അവർ തങ്ങളുടെ പരമ്പരാഗത ജേഴ്സിയിലാണ് കളിച്ചത്.
നീല ജേഴ്സിക്ക് വലിയൊരു വിജയ ചരിത്രമുണ്ടെങ്കിലും ചില കൈപ്പേറിയ അനുഭവങ്ങളും അർജന്റീനയ്ക്ക് ഈ ജേഴ്സി ധരിച്ചപ്പോൾ സംഭവിച്ചിട്ടുണ്ട്. അർജന്റീന തങ്ങളുടെ രണ്ട് ലോകകപ്പ് ഫൈനലുകളിൽ പരാജയപ്പെട്ടത് ഈ നീല ജേഴ്സി ധരിച്ചായിരുന്നു. 1990ലും 2014ലും. രണ്ട് തവണയും ജർമനിയോടാണ് തോറ്റത്. 2022ൽ ഖത്തറിൽ മെസി ലോകകിരീടം ഉയർത്തിയത് അർജന്റീനയുടെ പരമ്പരാഗത ആകാശനീല ജേഴ്സിയിലുമായിരുന്നു.
ഇംഗ്ലണ്ടിനെതിരെയുള്ള സെമി ഫൈനൽ പോരാട്ടത്തിൽ ഈ നീല ജേഴ്സി അർജന്റീനയ്ക്ക് വീണ്ടുമൊരു ഭാഗ്യം കൊണ്ടുവരുമോ അതോ ചരിത്രം വഴിമാറുമോ എന്ന് കാത്തിരുന്ന് കാണാം.
