ഐസ്വാള്‍: മുന്‍ മിസോറം രഞ്ജി ട്രോഫി താരം ഖ്വാല്‍ഹിങ് ലാല്‍റെമൃത ക്രിക്കറ്റ് പോരാട്ടത്തിനിടെ കുഴഞ്ഞു വീണ് മരിച്ചു. രണ്ടാം ഡിവിഷന്‍ ക്രിക്കറ്റ് പോരാട്ടത്തിനിടെയാണ് താരത്തിന്റെ ദാരുണാന്ത്യം. അദ്ദേഹത്തിന് 38 വയസായിരുന്നു.

ഖാലിദ് മെമ്മോറിയല്‍ രണ്ടാം ഡിവിഷന്‍ പോരാട്ടത്തിനിടെയാണ് സംഭവം. വെങ്‌നുവായ് റൈഡേഴ്‌സ് ക്രിക്കറ്റ് ക്ലബിനായാണ് താരം കളിക്കാനിറങ്ങിയത്. മത്സരം പുരോഗമിക്കുന്നതിനിടെ താരം സ്‌ട്രോക്ക് വന്നു വീഴുകയായിരുന്നു. പിന്നാലെ ആശുപത്രിയില്‍ എത്തിച്ചെങ്കിലും മരണം സംഭവിച്ചു.

മിസോറമിനായി രണ്ട് രഞ്ജി മത്സരങ്ങളും ഏഴ് സയ്യിദ് മുഷ്താഖ് അലി ട്രോഫി പോരാട്ടവും ലാല്‍റെമൃത കളിച്ചിട്ടുണ്ട്. 2018ല്‍ മേഘാലയക്കെതിരെ വിക്കറ്റ് കീപ്പര്‍ റോളിലാണ് താരം ഫസ്റ്റ് ക്ലാസ് ക്രിക്കറ്റില്‍ അരങ്ങേറിയത്. മിസോറമിലെ പ്രാദേശിക ക്രിക്കറ്റിലെ ഏറ്റവും ശ്രദ്ധേയ താരങ്ങളിലൊരാളാണ് ലാല്‍റെമൃത.