ടോക്യോ: ഒളിംപിക്സ് ഫുട്‌ബോളിൽ അർജന്റീനയ്ക്കും ഫ്രാൻസിനും വിജയം. ബ്രസീലിനെ ഐവറി കോസ്റ്റ് ഗോൾരഹിത സമനിലയിൽ കുരുക്കി. ഏഴ് ​ഗോൾ കണ്ട ത്രില്ലർ പോരാട്ടത്തിലാണ് ദക്ഷിണാഫ്രിക്കക്കെതിരെ ഫ്രാൻസ് വിജയം പിടിച്ചത്. 

അർജന്റീന എതിരില്ലാത്ത ഒരു ഗോളിന് ഈജിപ്തിനെ പരാജയപ്പെടുത്തി. 52-ാം മിനിറ്റിൽ പ്രതിരോധ താരം ഫെകുണ്ടോ മെദീനയാണ് അർജന്റീനയുടെ വിജയ ഗോൾ നേടിയത്.

ദക്ഷിണാഫ്രിക്കയെ 4-3നാണ് ഫ്രാൻസ് തോൽപ്പിച്ചത്. ആന്ദ്രെ പിയറെ ഗിഗ്നാക് നേടിയ ഹാട്രിക്ക് ​ഗോളുകളാണ് ഫ്രാൻസിനെ വിജയത്തിലേക്ക് നയിച്ചത്. തെജി സവനിയറുടെ വകയായിരുന്നു ഒരു ഗോൾ. ടെബൊഹൊ മൊകെയ്‌ന, എവിഡൻസ് മക്‌ഗോപ, കൊബമെലൊ കൊടിസാങ് എന്നിവരാണ് ദക്ഷിണാഫ്രിക്കയ്ക്കായി ലക്ഷ്യം കണ്ടത്.

മറ്റൊരു മത്സരത്തിൽ സ്പെയിനും വിജയം പിടിച്ചു. മറുപടിയില്ലാത്ത ഒറ്റ ​ഗോളിന് സ്പാനിഷ് സംഘം ഓസ്ട്രേലിയയെ വീഴ്ത്തി. മികേൽ ഒയാർസ്ബെലാണ് സ്പെയിനിനായി വല ചലിപ്പിച്ചത്. 81ാം മിനിറ്റിലായിരുന്നു ​ഗോൾ. ആദ്യ മത്സരത്തിൽ അർജന്റീനയെ ഞെട്ടിച്ച ഓസ്ട്രേലിയക്ക് പക്ഷേ രണ്ടാം പോരിൽ പിഴച്ചു.