കൊളംബോ: തുടരെ മൂന്ന് മത്സരങ്ങള്‍ ജയിച്ച് ഇംഗ്ലണ്ട് വനിതാ ലോകകപ്പില്‍ ഒന്നാം സ്ഥാനത്ത് കുതിക്കുന്നു. ശ്രീലങ്കന്‍ വനിതകള്‍ക്കെതിരായ പോരാട്ടത്തില്‍ 89 റണ്‍സിന്റെ ജയം പിടിച്ചാണ് ഇംഗ്ലണ്ട് വനിതകളുടെ കുതിപ്പ്. ആദ്യം ബാറ്റ് ചെയ്ത ഇംഗ്ലണ്ട് നിശ്ചിത ഓവറില്‍ 9 വിക്കറ്റ് നഷ്ടത്തില്‍ 253 റണ്‍സെടുത്തു. ജയം തേടിയിറങ്ങിയ ലങ്കന്‍ വനിതകള്‍ 45.4 ഓവറില്‍ 164 റണ്‍സില്‍ എല്ലാവരും പുറത്തായി.

ഇംഗ്ലണ്ടിനായി നാറ്റ് സീവര്‍ ബ്രാന്‍ഡ് സെഞ്ച്വറി നേടി. രണ്ട് വിക്കറ്റുകള്‍ വീഴ്ത്തി താരം ഓള്‍ റൗണ്ട് മികവുമായി കളം വാണു.

ലങ്കന്‍ നിരയില്‍ ആരും 50 കടന്നില്ല. 35 റണ്‍സെടുത്ത ഓപ്പണര്‍ ഹസിനി പെരേരയാണ് ടോപ് സ്‌കോറര്‍. ഹര്‍ഷിത സമരവിക്രമ (33), നിലാക്ഷിക സില്‍വ (23) എന്നിവരാണ് തിളങ്ങിയ മറ്റുള്ളവര്‍. എക്ട്രാ ഇനത്തില്‍ ഇംഗ്ലീഷ് ബൗളര്‍മാര്‍ 24 റണ്‍സ് സംഭാവനയും നല്‍കി. ക്യാപ്റ്റന്‍ ചമരി അട്ടപ്പട്ടുവിനു (15) തിളങ്ങാനായില്ല.

ഇംഗ്ലണ്ടിനായി സോഫി എക്ലസ്റ്റോണ്‍ 4 വിക്കറ്റുകള്‍ വീഴ്ത്തി ശ്രീലങ്കയെ തകര്‍ക്കുന്നതില്‍ മുന്നില്‍ നിന്നു. നാറ്റ് സീവര്‍ക്കു പുറമെ ചാര്‍ളി ഡീനും രണ്ട് വിക്കറ്റുകള്‍ സ്വന്തമാക്കി. അലിസ് കാപ്‌സി, ലിന്‍സി സ്മിത്ത് എന്നിവര്‍ രണ്ട് വീതം വിക്കറ്റുകള്‍ വീഴ്ത്തി.

ആദ്യം ബാറ്റ് ചെയ്ത ഇംഗ്ലണ്ട് നാറ്റ് സീവര്‍ ബ്രാന്‍ഡിന്റെ സെഞ്ച്വറി മികവിലാണ് പൊരുതാവുന്ന ടോട്ടലുയര്‍ത്തിയത്. താരം 117 പന്തില്‍ 9 ഫോറും 2 സിക്‌സും സഹിതം 117 റണ്‍സെടുത്തു. ടാമി ബ്യുമോണ്ട് (32), ഹീതര്‍ നൈറ്റ് (29) എന്നിവരാണ് തിളങ്ങിയ മറ്റുള്ളവര്‍.