കൊളംബോ: മഴ ഭീഷണിയ്ക്കിടെയാണ് ഇന്ത്യയും പാകിസ്ഥാനും തമ്മിലുള്ള ഐസിസി വനിതാ ലോകകപ്പിലെ പോരാട്ടം നടക്കുന്നത്. എന്നാല്‍ കളി ഇടയ്ക്കു 15 മിനിറ്റോളം നിര്‍ത്തി വച്ചു. മഴയായിരുന്നില്ല കാരണം. ഗ്രൗണ്ടിലൂടെ പറന്നു കളിച്ച ചെറു പ്രാണികളായിരുന്നു. ക്രിക്കറ്റ് ​ഗ്രൗണ്ടിൽ ഇതുവരെ കാണാത്ത വിചിത്ര സംഭവങ്ങളാണ് പ്രേമദാസ സ്റ്റേഡിയത്തില്‍ കണ്ടത്.

മത്സരം തുടങ്ങിയതിനു പിന്നാലെ തന്നെ പ്രാണികളുടെ ശല്യവും തുടങ്ങിയിരുന്നു. സ്‌പ്രേയടിച്ചും ടവലുപയോഗിച്ചു തട്ടിയകറ്റിയും താരങ്ങള്‍ പ്രാണികളെ തുരത്താന്‍ കിണഞ്ഞു ശ്രമിക്കുന്നുണ്ടായിരുന്നു. എന്നാല്‍ അസ്വസ്ഥതയ്ക്കു ശമനമുണ്ടായില്ല.

ഒടുവില്‍ സഹികെട്ട് താരങ്ങള്‍ അംപയറെ സമീപിച്ച് പ്രശ്‌നം ബോധ്യപ്പെടുത്തി. കളി തുടരാന്‍ സാധിക്കാതെ വന്നതോടെ ഇരു ടീമുകളിലേയും താരങ്ങള്‍ ഗ്രൗണ്ട് വിട്ടു. പിന്നാലെയാണ് കളി നിര്‍ത്തി വച്ചത്.

പിന്നീട് വലിയ രീതിയില്‍ സ്േ്രപ ചെയ്താണ് പ്രാണി ശല്യത്തെ ഒരുവിധത്തില്‍ വരുതിയില്‍ നിര്‍ത്തിയത്. പിന്നീട് മത്സരം പുനരാരംഭിക്കുകയും ചെയ്തു.