ദുബായ്: ടി20 ലോകകപ്പിലെ അവസാന ഗ്രൂപ്പ് മത്സരത്തിൽ നമീബിയക്കെതിരേ ഇന്ത്യയ്ക്ക് ഒൻപത് വിക്കറ്റ് ജയം. ടൂർണമെന്റിൽ നിന്ന് പുറത്തായ ഇന്ത്യ ജയത്തോടെ പോരാട്ടം അവസാനിപ്പിച്ചു. ടി20 ക്യാപ്റ്റൻ സ്ഥാനത്ത് നിന്ന് വിരാട് കോഹ്‌ലിക്കും പരിശീലക സ്ഥാനത്ത് നിന്ന് രവി ശാസ്ത്രിക്കും ജയത്തോടെ പടിയിറക്കം. 

നമീബിയ ഉയർത്തിയ 133 റൺസ് വിജയ ലക്ഷ്യം ഇന്ത്യ 15.2 ഓവറിൽ ഒരു വിക്കറ്റ് മാത്രം നഷ്ടപ്പെടുത്തി മറികടന്നു. അർധ സെഞ്ച്വറി നേടിയ രോഹിത് ശർമയും കെഎൽ രാഹുലും ഇന്ത്യയ്ക്കായി തിളങ്ങി. 

രോഹിത് 37 പന്തിൽ നിന്ന് രണ്ട് സിക്‌സും ഏഴ് ഫോറുമടക്കം 56 റൺസെടുത്തു. 36 പന്തുകൾ നേരിട്ട രാഹുൽ രണ്ട് സിക്‌സും നാല് ഫോറുമടക്കം 54 റൺസോടെ പുറത്താകാതെ നിന്നു. ഇരുവരും ചേർന്ന് ഓപ്പണിങ് വിക്കറ്റിൽ 86 റൺസിന്റെ കൂട്ടുകെട്ടുണ്ടാക്കി. സൂര്യകുമാർ യാദവ് 19 പന്തിൽ നിന്ന് 25 റൺസോടെ പുറത്താകാതെ നിന്നു.

നേരത്തെ ടൂർണമെന്റിൽ നിന്ന് ഇന്ത്യ സെമി കാണാതെ പുറത്തായിരുന്നു. ആദ്യ മത്സരത്തിൽ പാകിസ്താനോടും രണ്ടാം മത്സരത്തിൽ ന്യൂസിലൻഡിനോടും നേരിട്ട തോൽവികളാണ് ഇന്ത്യയ്ക്ക് വിനയായത്. 

ലോകകപ്പിനു ശേഷം ടി20 ടീമിന്റെ നായക സ്ഥാനം ഒഴിയുമെന്ന് കോഹ്‌ലി നേരത്തെ പ്രഖ്യാപിച്ചിരുന്നു. കോച്ച് ശാസ്ത്രിക്കും ടീമിനൊപ്പമുള്ള അവസാന മത്സരമായിരുന്നു ഇത്. ലോകകപ്പോടെ ശാസ്ത്രി ടീമിന്റെ പരിശീലക സ്ഥാനം ഒഴിയുകയാണ്. പുതിയ പരിശീലകനായി രാഹുൽ ദ്രാവിഡിനെ ബിസിസിഐ പ്രഖ്യാപിച്ചിരുന്നു.

നേരത്തെ ടോസ് നേടിയ ഇന്ത്യൻ ക്യാപ്റ്റൻ വിരാട് കോഹ്‌ലി ബൗളിങ് തിരഞ്ഞെടുക്കുകയായിരുന്നു. ഇന്ത്യൻ ടീമിൽ വരുൺ ചക്രവർത്തിക്ക് പകരം രാഹുൽ ചഹർ ഇടം പിടിച്ചു.

ആദ്യം ബാറ്റിങ്ങിനിറങ്ങിയ നമീബിയ നിശ്ചിത 20 ഓവറിൽ എട്ട് വിക്കറ്റ് നഷ്ടത്തിൽ 132 റൺസാണ് കണ്ടെത്തിയത്. മൂന്ന് വിക്കറ്റ് വീതം വീഴ്ത്തിയ രവീന്ദ്ര ജഡേജയും ആർ അശ്വിനും ഇന്ത്യയ്ക്കായി തിളങ്ങി. നാല് ഓവറിൽ 16 റൺസ് മാത്രം വഴങ്ങിയാണ് ജഡേജ മൂന്ന് വിക്കറ്റ് വീഴ്ത്തിയത്. അശ്വിൻ നാല് ഓവറിൽ 20 റൺസ് വഴങ്ങി മൂന്നു വിക്കറ്റെടുത്തു. ജസ്പ്രീത് ബുമ്റ രണ്ട് വിക്കറ്റ് വീഴ്ത്തി.

25 പന്തിൽ നിന്ന് രണ്ട് ബൗണ്ടറിയടക്കം 26 റൺസെടുത്ത ഡേവിഡ് വീസാണ് നമീബിയയുടെ ടോപ് സ്‌കോറർ. സ്റ്റീഫൻ ബാർഡ് (21), മൈക്കൽ വാൻ ലിംഗെൻ (14), ക്യാപ്റ്റൻ ജെർഹാർഡ് എറാസ്മസ് (12), ജാൻ ഫ്രൈലിങ്ക് (15*), റൂബൻ ട്രംപൽമാൻ (13*) എന്നിവരാണ് വീസിനെ കൂടാതെ നമീബിയൻ നിരയിൽ രണ്ടക്കം കടന്നവർ. ക്രെയ്ഗ് വില്യംസ് (0), ലോഫ്റ്റി ഈറ്റൺ (5), ജെ.ജെ സ്മിത്ത് (9), സെയ്ൻ ഗ്രീൻ (0) എന്നിവരാണ് പുറത്തായ മറ്റ് താരങ്ങൾ.