അഹമ്മദാബാദ്: ഇംഗ്ലണ്ടിനെതിരെ ജയം അനിവാര്യമായ നാലാം ടി20യില്‍ ഇന്ത്യ പുറത്തെടുക്കാന്‍ ലക്ഷ്യമിടുന്നത് ഓള്‍റൗണ്ട് മികവ്. കഴിഞ്ഞ മൂന്ന് ടി20യിലും രണ്ടാമത് ബാറ്റ് ചെയ്ത ടീം അനായാസം ജയം പിടിച്ചിരുന്നു. ഈ സാഹചര്യത്തില്‍ ടോസ് നിര്‍ണായകമാണെന്ന വിലയിരുത്തല്‍ ഉയരുമ്പോഴാണ് ടോസ് ഘടകം തള്ളി മുന്‍പോട്ട് പോവാന്‍ ഇന്ത്യ ലക്ഷ്യമിടുന്നത്. 

പരമ്പരയില്‍ ഇന്ത്യ തോറ്റ രണ്ട് കളിയിലും ആദ്യം ബാറ്റ് ചെയ്യുകയായിരുന്നു. പവര്‍പ്ലേയില്‍ ഇന്ത്യക്ക് പിഴച്ചു. ഇത് മികച്ച ടോട്ടലിലേക്ക് എത്തുന്നതിന് തിരിച്ചടിയായി. എന്നാല്‍ ടോസ് ലഭിച്ചാല്‍ ഇനിയുള്ള രണ്ട് ടി20യിലും ആദ്യം ബാറ്റ് ചെയ്യണം എന്നാണ് മുന്‍ നായകന്‍ നാസര്‍ ഹുസെയ്ന്‍ ഇംഗ്ലണ്ട് താരങ്ങളോട് പറയുന്നത്. 

ഈ സാഹചര്യങ്ങളില്‍ ആദ്യം ബാറ്റ് ചെയ്ത് പ്രതിരോധിക്കുന്നത് കാണാനാണ് ഇഷ്ടം. അങ്ങനെ വരുമ്പോഴെ എത്രമാത്രം മികച്ചതാണ് നിങ്ങളുടെ ടീം എന്ന് അറിയാനാവു, നാസര്‍ ഹുസെയ്ന്‍ പറഞ്ഞു. ഇന്ത്യ വേദിയാവുന്ന ടി20 ലോകകപ്പ് ജയിക്കുക മികച്ച ടോസറായിരിക്കും എന്ന പരിഹാസവുമായി മൈക്കല്‍ വോണും എത്തി.