മുംബൈ: ഇന്ത്യ- ഓസ്‌ട്രേലിയ ടെസ്റ്റ് പരമ്പരയില്‍ ജസ്പ്രിത് ബുംറയുടെ സാന്നിധ്യമാണ് ഈ നിലയ്ക്കുള്ള ആശ്വാസമെങ്കിലും ഇന്ത്യക്ക് സമ്മാനിച്ചതെന്നു മുന്‍ ഇന്ത്യന്‍ താരവും ഇതിഹാസ സ്പിന്നറുമായ ഹര്‍ഭജന്‍ സിങ്. ബുംറ ഇല്ലായിരുന്നെങ്കില്‍ ഇന്ത്യ 5-0ത്തിനു പരമ്പര അടിയറ വയ്ക്കുമായിരുന്നു എന്ന് ഹര്‍ഭജന്‍ തുറന്നടിച്ചു.

'ഈ പര്യടനത്തില്‍ ജസ്പ്രിത് ബുംറ ഇല്ലായിരുന്നു എങ്കില്‍ ഇന്ത്യ 5-0ത്തിനു പരമ്പര അടിയറ വയ്ക്കുമായിരുന്നു. പെര്‍ത്തില്‍ ജാസി ഇന്ത്യയെ രക്ഷിച്ചു. അഡ്‌ലെയ്ഡിനു ശേഷം പിന്നീട് നടന്ന മൂന്ന് മത്സരങ്ങളിലും ഇന്ത്യയെ രക്ഷപ്പെടുത്തിയ ഏക താരവും അദ്ദേഹമാണ്. അദ്ദേഹം ഓസീസ് മണ്ണിലേക്ക് വന്നിരുന്നില്ലെങ്കില്‍ ഇന്ത്യ 5-0ത്തിനോ 4-0ത്തിനോ പരമ്പര കൈവിടുമായിരുന്നു'- ഹര്‍ഭജന്‍ തുറന്നടിച്ചു.

5 മത്സരങ്ങളടങ്ങിയ ടെസ്റ്റ് പരമ്പര ഓസ്‌ട്രേലിയ 3-1നു സ്വന്തമാക്കിയിരുന്നു. ഓസ്‌ട്രേലിയന്‍ നിരയില്‍ ഭീതി വിതച്ച ഏക ഇന്ത്യന്‍ താരം ബുംറയായിരുന്നു. ഇക്കാര്യം ചൂണ്ടിക്കാട്ടുകയാണ് ഹര്‍ഭജന്‍.

ഇനി വൈറ്റ് ബോള്‍ ക്രിക്കറ്റ് കളിക്കില്ല; വിരമിക്കല്‍ പ്രഖ്യാപിച്ച് ഋഷി ധവാന്‍

ബുംറയെ രാജ്യത്തിന്റെ സമ്പത്ത് എന്നാണ് ഹര്‍ഭജന്‍ വിശേഷിപ്പിച്ചത്. പെര്‍ത്തില്‍ നടന്ന ആദ്യ ടെസ്റ്റില്‍ രോഹിതിന്റെ അഭാവത്തില്‍ ടീമിനെ നയിച്ചത് ബുംറയാണ്. ഇന്ത്യയുടെ ഓരേയൊരു ജയത്തിന്റെ മാസ്റ്റര്‍ മൈന്‍ഡും ബുംറ തന്നെ.

5 മത്സരങ്ങളില്‍ മാരകമായി പന്തെറിഞ്ഞ ബുംറ 32 വിക്കറ്റുകളാണ് വീഴ്ത്തിയത്. പരമ്പരയുടെ താരവും ഇന്ത്യയുടെ താത്കാലിക നായകന്‍ തന്നെ. ഓസീസ് മണ്ണില്‍ ഒരു ടെസ്റ്റ് പരമ്പരയില്‍ ഏറ്റവും കൂടുതല്‍ വിക്കറ്റെടുക്കുന്ന ഇന്ത്യന്‍ താരമെന്ന നേട്ടവും ബുംറയ്ക്ക് തന്നെ.