ലണ്ടൻ: ഇം​ഗ്ലീഷ് മണ്ണിൽ ഉജ്ജ്വല ബൗളിങ് മികവ് ആവർത്തിച്ച് ഇന്ത്യയുടെ ഉയർന്നുവരുന്ന സ്പിന്നർ മാനവ് സുതർ. താരം ഫസ്റ്റ് ക്ലാസ് ക്രിക്കറ്റിൽ അപൂർവ റെക്കോർഡും സ്ഥാപിച്ചു. ശ്രീലങ്കക്കെതിരായ പരമ്പരയിൽ ഇന്ത്യക്കായി മികച്ച പ്രകടനം പുറത്തെടുത്തതിനു പിന്നാലെയാണ് താരം ഇം​ഗ്ലണ്ടിലേക്ക് പറന്നത്. ഇടങ്കയ്യൻ ഓർത്തഡോക്സ് സ്പിന്നറായ മാനവ് സുതർ ഇം​ഗ്ലീഷ് കൗണ്ടി ചാംപ്യൻഷിപ്പിൽ വാര്‍വിക്ക്‌ഷെയറിനായാണ് കളിക്കുന്നത്.

ഹാംപ്ഷെയറിനെതിരെ കഴിഞ്ഞ ദിവസം 7 വിക്കറ്റുകൾ വീഴ്ത്തിയ സുതർ ​ഗ്ലാമോർ​ഗനെതിരായ പോരിൽ മൂന്ന് വിക്കറ്റുകളും നേടി. ​ഗ്ലാമോർ​ഗനെതിരായ പോരാട്ടത്തിലാണ് താരം റെക്കോർഡിട്ടത്. മത്സരത്തിൽ 15 പന്തുകൾക്കിടെ താരം 3 വിക്കറ്റുകൾ വീഴ്ത്തി. ഒരു റൺ പോലും വിട്ടുകൊടുക്കാതെയാണ് താരത്തിന്റെ മികച്ച ബൗളിങ്. ഒന്നാം ഇന്നിങ്സിൽ 3 പന്തുകൾ മാത്രമാണ് താരത്തിന് എറിയേണ്ടി വന്നത്. ഇതിൽ ഒരു റൺപോലും വഴങ്ങാതെ ഒരു വിക്കറ്റ്. പിന്നാലെ രണ്ടാം ഇന്നിങ്സിൽ 2 ഓവറുകൾ എറിഞ്ഞ താരം രണ്ടും മെയ്ഡനാക്കി 2 വിക്കറ്റുകൾ കൂടി വീഴ്ത്തി.

ഫസ്റ്റ് ക്ലാസ് ക്രിക്കറ്റിന്റെ 131 വർഷത്തെ ചരിത്രത്തിൽ ഒരു റൺ പോലും വഴങ്ങാതെ 3 വിക്കറ്റെടുക്കുന്ന ആദ്യ ബൗളറായി സുതർ മാറി. നേരത്തെ 1895ലാണ് ഇത്തരമൊരു ബൗളിങ് അവസാനമായി കൗണ്ടിയിൽ പിറന്നത്. അന്ന് ഇം​ഗ്ലണ്ടിന്റെ ടോം ​ഹേവാർഡാണ് ഇത്തരത്തിൽ ഒരു റൺ പോലും വഴങ്ങാതെ 3 വിക്കറ്റുകൾ വീഴ്ത്തിയത്. ആറ് പന്തിലായിരുന്നു താരത്തിന്റെ 3 വിക്കറ്റ് നേട്ടം. സറേയ്ക്കെതിരായ പോരാട്ടത്തിൽ ലെസ്റ്റർഷെയറിനായാണ് ടോം ​ഹേവാർഡിന്റെ ഈ മിന്നും പ്രകടനം. അതിനു ശേഷം ഇപ്പോഴാണ് സമാന രീതിയിലുള്ള ബൗളിങ്.

മത്സരത്തിൽ വാര്‍വിക്ക്‌ഷെയര്‍ ഇന്നിങ്സിനും 257 റൺസിനും കൂറ്റൻ ജയമാണ് സ്വന്തമാക്കിയത്. ആദ്യ ഇന്നിങ്സിൽ വാര്‍വിക്ക്‌ഷെയര്‍ 391 റൺസ് നേടി. ​ഗ്ലാമോർ​ഗൻ ഒന്നാം ഇന്നിങ്സിൽ വെറും 69 റൺസിനും രണ്ടാം ഇന്നിങ്സിൽ വെറും 65 റൺസിലും ഓൾ ഔട്ട്.

ഇന്ത്യൻ ടെസ്റ്റ് ടീമിൽ അനിവാര്യനായി മാറിക്കൊണ്ടിരിക്കുന്ന താരമാണ് സുതർ. ഇതുവരെ താരം 3 ടെസ്റ്റുകൾ മാത്രമാണ് ഇന്ത്യൻ ജേഴ്സിയിൽ കളിച്ചത്. ആർ അശ്വിൻ വിരമിക്കുകയും രവീന്ദ്ര ജഡേജ കരിയറിന്റെ സായാഹ്നത്തിൽ എത്തി നിൽക്കുകയും ചെയ്യുന്ന ഘട്ടത്തിലാണ് 24കാരൻ മികവ് ആവർത്തിക്കുന്നത്. മികച്ച ബൗളിങ് ആക്ഷനുള്ള താരത്തിന്റെ പന്തുകൾ സു​ഗമവും ക്ലാസിക്ക് ഹൈ ആം റിലീസോടെ അവസാനിക്കുന്നതുമാണ്. ബാറ്ററുടെ കാഴ്ച പരിധിക്കും മുകളിലൂടെ പന്ത് ഫ്ലോട്ട് ചെയ്യിക്കാനും അവരെ ഒരു സെക്കൻഡ് അധികം കാത്തിരിക്കാനും പ്രേരിപ്പിക്കുന്ന ബൗളിങ് കൂടിയാണ് താരത്തിന്റേത്. കൃത്യം പ്ലാനിങോടെയാണ് താരം ഓരോ ബാറ്റർമാർക്കെതിരേയും പന്തെറിയുന്നത്.

ഈ വർഷം ജൂലൈയിൽ അഫ്​ഗാനിസ്ഥാനെതിരെയാണ് അദ്ദേഹം അന്താരാഷ്ട്ര ടെസ്റ്റിൽ ഇന്ത്യക്കായി അരങ്ങേറിയത്. അരങ്ങേറ്റ ടെസ്റ്റിൽ 7 വിക്കറ്റുകൾ വീഴ്ത്തി. പിന്നാലെയാണ് ശ്രീലങ്കക്കെതിരായ ടെസ്റ്റ് പരമ്പരയിലെ രണ്ട് മത്സരങ്ങൾ താരം കളിച്ചത്. പരമ്പരയിൽ 16 വിക്കറ്റുകളും താരം വീഴ്ത്തി.