മുംബൈ: ഐപിഎല്ലിൽ ഇന്നലെ നടന്ന മത്സരത്തിൽ ഡൽഹി ക്യാപ്പിറ്റൽസിനെതിരേ റോയൽ ചലഞ്ചേഴ്സ് ബാംഗ്ലൂരിന് ജയം. ബാംഗ്ലൂർ ഉയർത്തിയ 190 റൺസ് വിജയലക്ഷ്യം പിന്തുടർന്ന ഡൽഹി 16 റൺസിനാണ് തോൽവി സമ്മതിച്ചത്. 20 ഓവറിൽ ഏഴു വിക്കറ്റ് നഷ്ടത്തിൽ 173 റൺസെടുക്കാനേ ഡൽഹിക്ക് സാധിച്ചുള്ളൂ.

ഡൽഹിക്കായി പൃഥ്വി ഷായും ഡേവിഡ് വാർണറും ചേർന്ന് മികച്ച തുടക്കമാണ് സമ്മാനിച്ചത്. അഞ്ചു സിക്‌സും നാല് ഫോറുമടക്കം 66 റൺസെടുത്ത ഓപ്പണർ വാർണറാണ് ഡൽഹിയുടെ ടോപ് സ്‌കോറർ. ഓപ്പണിങ് വിക്കറ്റിൽ ഇരുവരും ചേർന്ന് 28 പന്തിൽ നിന്ന് 50 റൺസ് അടിച്ചെടുത്തു. 12-ാം ഓവറിൽ വാർണർ പുറത്തായി. മാർഷ് 24 പന്തിൽ നിന്ന് 14 റൺസുമായി പുറത്തായി.  റോവ്മാൻ പവലിനെ (0) ആദ്യ പന്തിൽ തന്നെ തിരിച്ചയച്ചു. 

ഏഴ് പന്തിൽ നിന്ന് രണ്ട് സിക്‌സും മൂന്ന് ഫോറുമടക്കം 34 റൺസെടുത്ത് ക്യാപ്റ്റൻ ഋഷഭ് പന്ത് പൊരുതി നോക്കിയെങ്കിലും ഫലമുണ്ടായില്ല. 17-ാം ഓവറിൽ നായകനും പുറത്തായി. ശാർദുൽ താക്കൂർ (17), ലളിത് യാദവ് (1), അക്ഷർ പട്ടേൽ (10*), കുൽദീപ് യാദവ് (10*) എന്നിങ്ങനെയാണ് മറ്റു താരങ്ങളുടെ പ്രകടനം. ആർസിബിക്കായി ഹെയ്‌സൽവുഡ് മൂന്നും സിറാജ് രണ്ടും വിക്കറ്റുകൾ വീഴ്ത്തി.

നേരത്തെ ടോസ് നഷ്ടപ്പെട്ട് ബാറ്റിംഗിനിറങ്ങിയ ബാംഗ്ലൂർ അഞ്ച് വിക്കറ്റ് നഷ്ടത്തിൽ 189 റൺസെടുത്തു. ഗ്ലെൻ മാക്‌സ്വെൽ (34 പന്തിൽ 55), ദിനേശ് കാർത്തിക് (34 പന്തിൽ പുറത്താവാതെ 66) എന്നിവരുടെ ചെറുത്തുനിൽപ്പാണ് ബാംഗ്ലൂരിന് മികച്ച സ്കോർ സമ്മാനിച്ചത്. 

ഈ വാര്‍ത്ത കൂടി വായിക്കൂ

മാക്‌സ്‌വെല്ലും കാർത്തിക്കും തിളങ്ങി; ഡൽഹിക്ക് മുന്നിൽ 190 റൺസ് വിജയലക്ഷ്യം 

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ