ബംഗളൂരു: ഐപിഎല്ലില്‍ നിര്‍ണായക മത്സരത്തില്‍ റോയല്‍ ചലഞ്ചേഴ്‌സ് ബംഗളൂരുവിനോട് പരാജയപ്പെട്ട് ഡല്‍ഹി ക്യാപിറ്റല്‍സ്. ഇതോടെ അവരുടെ പ്ലേ ഓഫ് സാധ്യതകള്‍ക്ക് വലിയ തിരിച്ചടി. തുടര്‍ച്ചയായ അഞ്ചാം ജയവുമായി ബംഗളൂരു നേരിയ പ്ലേ ഓഫ് സാധ്യത നിലനിര്‍ത്തുകയും ചെയ്തു.

47 റണ്‍സിന്റെ ജയമാണ് ആര്‍സിബി സ്വന്തമാക്കിയത്. ടോസ് നഷ്ടപ്പെട്ട് ബാറ്റിങ്ങിനിറങ്ങിയ ബംഗളൂരു നിശ്ചിത ഓവറില്‍ ഒന്‍പത് വിക്കറ്റ് നഷ്ടത്തിലാണ് 187 റണ്‍സെടുത്തു. മറുപടി പറഞ്ഞ ഡല്‍ഹിയുടെ പോരാട്ടം 19.1 ഓവറില്‍ 140 റണ്‍സില്‍ അവസാനിച്ചു.

ക്യാപ്റ്റന്‍ ഋഷഭ് പന്തിന്റെ അഭാവത്തില്‍ ടീമിനെ നയിച്ച അക്ഷര്‍ പട്ടേല്‍ അര്‍ധ സെഞ്ച്വറിയുമായി മുന്നില്‍ നിന്നെങ്കിലും ഷായ് ഹോപ്, ജാക് ഫ്രേസര്‍ മക്ഗുര്‍ഗ് എന്നിവരൊഴികെ മറ്റൊരാളും തിളങ്ങാഞ്ഞത് അവര്‍ക്ക് തിരിച്ചടിയായി. അക്ഷര്‍ 39 പന്തില്‍ അഞ്ച് ഫോറും മൂന്ന് സിക്‌സും സഹിതം 57 റണ്‍സെടുത്തു. ഹോപ് 29 റണ്‍സും മക്ഗുര്‍ഗ് 21 റണ്‍സും കണ്ടെത്തി.

ബംഗളൂരുവിനായി യഷ് ദയാല്‍ മൂന്ന് വിക്കറ്റുകള്‍ വീഴ്ത്തി. ലോക്കി ഫെര്‍ഗുസന്‍ രണ്ടും വിക്കറ്റ് വീഴ്ത്തി. സ്വപ്‌നില്‍ സിങ്, മുഹമ്മദ് സിറാജ്, കമറൂണ്‍ ഗ്രീന്‍ എന്നിവര്‍ ഓരോ വിക്കറ്റ് വീഴ്ത്തി.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

നേരത്തെ 32 പന്തില്‍ നിന്ന് മൂന്ന് വീതം സിക്‌സും ഫോറുമടക്കം 52 റണ്‍സെടുത്ത പടിദാറാണ് ആര്‍സിബിയുടെ ടോപ് സ്‌കോറര്‍. വില്‍ ജാക്ക്‌സ് (29 പന്തില്‍ 41), കാമറൂണ്‍ ഗ്രീന്‍ (24 പന്തില്‍ 32*) എന്നിവരുടെ ഇന്നിങ്‌സുകളും ബംഗളൂരുവിന്റെ ഇന്നിങ്‌സില്‍ നിര്‍ണായകമായി. മൂന്നാം വിക്കറ്റില്‍ പടിദാര്‍- വില്‍ ജാക്‌സ് സഖ്യം കൂട്ടിച്ചേര്‍ത്ത 88 റണ്‍സാണ് ആര്‍സിബി ഇന്നിങ്‌സിന്റെ നട്ടെല്ല്.

ബാറ്റിങ്ങിനിറങ്ങിയ ആര്‍സിബിക്ക് മൂന്നാം ഓവറില്‍ തന്നെ ക്യാപ്റ്റന്‍ ഫാഫ് ഡുപ്ലെസിയെ (6) നഷ്ടമായിരുന്നു. എന്നാല്‍ ഒരറ്റത്ത് ബാറ്റിങ് വെടിക്കെട്ട് തുടര്‍ന്ന വിരാട് കോഹ്‌ലി സ്‌കോര്‍ ഉയര്‍ത്തി. 13 പന്തില്‍ നിന്ന് മൂന്ന് സിക്‌സും ഒരു ഫോറുമടക്കം 27 റണ്‍സെടുത്താണ് താരം പുറത്തായത്.

24 പന്തില്‍ നിന്ന് രണ്ടു സിക്‌സും ഒരു ഫോറുമടക്കം 32 റണ്‍സെടുത്ത കാമറൂണ്‍ ഗ്രീനാണ് സ്‌കോര്‍ 187ല്‍ എത്തിച്ചത്. മഹിപാല്‍ ലോംറോര്‍ (13), ദിനേഷ് കാര്‍ത്തിക്ക് (0), ഇംപാക്റ്റ് പ്ലെയര്‍ സ്വപ്നില്‍ സിങ് (0) എന്നിവരാണ് പുറത്തായ മറ്റ് താരങ്ങള്‍.