ഹൈദരാബാദ്: ഐപിഎല്ലില് ലഖ്നൗ സൂപ്പര് ജയന്റ്സിനു സീസണിലെ ആദ്യ ജയം. സണ്റൈസേഴ്സ് ഹൈദരാബാദിനെ അവര് 5 വിക്കറ്റിനു അനായാസം വീഴ്ത്തി. ആദ്യം ബാറ്റ് ചെയ്ത ഹൈദരാബാദ് നിശ്ചിത ഓവറില് 9 വിക്കറ്റ് നഷ്ടത്തില് 190 റണ്സ് ചേര്ത്തു. വെറും 16.1 ഓവറില് 5 വിക്കറ്റ് മാത്രം നഷ്ടത്തില് എല്എസ്ജി 193 റണ്സടിച്ചു വിജയം സ്വന്തമാക്കി.
18 പന്തില് അര്ധ സെഞ്ച്വറിയും 26 പന്തില് 70 റണ്സ് അടിച്ചും നിക്കോളാസ് പുരാന് കത്തിക്കയറിയപ്പോള് എസ്ആര്എച് ബൗളര്മാര് ഉത്തരമില്ലാതെ നിന്നു. താരം 6 വീതം സിക്സും ഫോറും പറത്തി.
തുടക്കത്തില് തന്നെ ഓപ്പണര് എയ്ഡന് മാര്ക്രത്തെ അവര്ക്ക് നഷ്ടമായിരുന്നു. എന്നാല് പിന്നീട് സഹ ഓപ്പണര് മിച്ചല് മാര്ഷിനൊപ്പം പുരാന് ചേര്ന്നതോടെ കഥ മാറി. ഇരുവരും കടിഞ്ഞാണേന്തി. മാര്ഷ് 31 പന്തില് 7 ഫോറും 2 സിക്സും സഹിതം 52 റണ്സെടുത്തു.
ക്യാപ്റ്റന് ഋഷഭ് പന്ത് ഒരു സിക്സടിച്ചൊക്കെ തുടങ്ങിയെങ്കിലും 15 റണ്സുമായി മടങ്ങി. ആയുഷ് ബദോനി 6 റണ്സുമായി പുറത്തായി. ഡേവിഡ് മില്ലര് 13 റണ്സുമായി പുറത്താകാതെ നിന്നു. അബ്ദുല് സമദ് 8 പന്തില് 2 വീതം സിക്സും ഫോറും സഹിതം 22 റണ്സെടുത്തു ടീമിനെ അതിവേഗം ജയത്തിലെത്തിച്ചു.
മാര്ഷിനേയും പുരാനേയും മടക്കി ക്യാപ്റ്റന് പാറ്റ് കമ്മിന്സ് ഹൈദരാബാദിനെ മത്സരത്തിലേക്ക് മടക്കിക്കൊണ്ടുവരാന് ശ്രമിച്ചെങ്കിലും വിജയിച്ചില്ല. താരം രണ്ട് വിക്കറ്റുകള് വീവ്ത്തി. മുഹമ്മദ് ഷമി, ആദം സാംപ, ഹര്ഷല് പട്ടേല് എന്നിവര് ഓരോ വിക്കറ്റെടുത്തു.
നേരത്തെ ഓപ്പണര് ട്രാവിസ് ഹെഡ്, നിതീഷ് കുമാര് റെഡ്ഡി, ഹെയ്ന്റിച് ക്ലാസന്, അനികേത് വര്മ, പാറ്റ് കമ്മിന്സ് എന്നിവരുടെ വെടിക്കെട്ടാണ് ഹൈദരാബാദിനെ പൊരുതാവുന്ന സ്കോറിലേക്ക് നയിച്ചത്. ഹെഡ് 3 സിക്സും 5 ഫോറും സഹിതം 28 പന്തില് 47 റണ്സെടുത്തു. നിതീഷ് 28 പന്തില് 32 റണ്സടിച്ചു. ക്ലാസന് 17 പന്തില് 26 റണ്സ് കണ്ടെത്തി. അനികേതാണ് തീപ്പൊരിയായത്. താരം 13 പന്തില് 5 സിക്സുകള് സഹിതം 36 റണ്സ് വാരി. കമ്മിന്സ് 4 പന്തില് 3 സിക്സുകള് സഹിതം 18 റണ്സും അടിച്ചെടുത്തു.
ലഖ്നൗവിന്റെ ഭാഗ്യമായി മാറുകയാണ് ശാര്ദുല് ഠാക്കൂര്. ഇത്തവണയും താരം തുടക്കത്തില് ഒരോവറില് തുടരെ രണ്ട് വിക്കറ്റുകള് വീഴ്ത്തി സണ്റൈസേഴ്സിനെ ഞെട്ടിച്ചു. കഴിഞ്ഞ മത്സരത്തില് സെഞ്ച്വറിക്കാരന് ഇഷാന് കിഷനെ ശാര്ദുല് ഗോള്ഡന് ഡക്കില് മടക്കി. താരം മത്സരത്തില് 4 വിക്കറ്റുകള് വീഴ്ത്തി. അവേശ് ഖാന്, ദിഗ്വേഷ് രതി, രവി ബിഷ്ണോയ്, പ്രിന്സ് യാദവ് എന്നിവര് ഓരോ വിക്കറ്റെടുത്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates