ടോക്കിയോ: ടോക്കിയോ  ഒളിമ്പിക്സിലെ വേഗമേറിയ താരമായി ഇറ്റലിയുടെ ലാമൗണ്ട് മാഴ്സല്‍ ജേക്കബ്സ്. പുരുഷന്മാരുടെ 100 മീറ്റര്‍ 9.80 സെക്കന്‍ഡുകൊണ്ട് മറികടന്നാണ് ജേക്കബ്സ് സ്വര്‍ണം നേടിയത്. 

അമേരിക്കയുടെ ഫ്രെഡ് കെര്‍ലി വെള്ളിയും കാനഡയുടെ ആന്ദ്രെ ഡെ ഗ്രാസ്സെ വെങ്കലവും സ്വന്തമാക്കി. കെര്‍ലി 9.84 സെക്കന്‍ഡിലും ഗ്രാസ്സെ 9.89 സെക്കന്‍ഡിലും മത്സരം പൂര്‍ത്തീകരിച്ചു. ജേക്കബ്സിന്റെ കരിയറിലെ ഏറ്റവും മികച്ച സമയമാണിത്. ഒപ്പം യൂറോപ്പിലെ ഏറ്റവും വേഗതയേറിയ താരമെന്ന റെക്കോഡും താരം സ്വന്തമാക്കി. കെര്‍ലിയുടെയും ഗ്രാസ്സെയുടെയും കരിയറിലെ ഏറ്റവും മികച്ച പ്രകടനമാണ് ഇന്ന് ഫൈനലില്‍ പിറന്നത്. 

2008 മുതലുള്ള തുടർച്ചയായ 3 ഒളിംപിക്സിൽ സ്വർണം നേടിയ ജമൈക്കയുടെ ഉസൈൻ ബോൾട്ടിന്റെ അസാന്നിധ്യത്തിൽ ഏറ്റവും അധികം മെഡൽ സാധ്യത കൽപിക്കപ്പെട്ടിരുന്ന ജമൈക്കയുടെതന്നെ ജസ്റ്റിൻ ഗാറ്റ്ലിനു ഫൈനലിനു യോഗ്യത നേടാനായിരുന്നില്ല. ഇതോടെയാണു തുടർച്ചയായ 3 ഒളിംപിക്സുകൾക്കു ശേഷം ജമൈക്കൻ താരങ്ങൾ ഇല്ലാത്ത ഫൈനലിന് അരങ്ങൊരുങ്ങിയത്. ഫൈനലില്‍ ബ്രിട്ടന്റെ ഷാര്‍നെല്‍ ഹ്യൂസ് ഫൗള്‍ സ്റ്റാര്‍ട്ട് നടത്തി അയോഗ്യനായതോടെ എട്ടുപേരാണ് 100 മീറ്റര്‍ ഓട്ടത്തില്‍ പങ്കെടുത്തത്.