അഡ്‌ലെയ്ഡ്: ഓസ്ട്രേലിയയും ഇം​ഗ്ലണ്ടും തമ്മിലുള്ള ആഷസ് പരമ്പരയ്ക്കിടെ അടിവയറ്റിൽ പന്ത് കൊണ്ട് ഇം​ഗ്ലീഷ് ക്യാപ്റ്റൻ ജോ റൂട്ടിന് പരിക്ക്. അഡ്‌ലെയ്ഡിൽ നടന്ന ഡേ- നൈറ്റ് ടെസ്റ്റിന്റെ നാലാം ദിനത്തിലാണ് സംഭവം. രണ്ടാം ഇന്നിങ്‌സിൽ ബാറ്റ് ചെയ്യുന്നതിനിടെ ഓസീസ് പേസർ മിച്ചൽ സ്റ്റാർക്ക് എറിഞ്ഞ 42-ാം ഓവറിലെ ആദ്യ പന്ത് റൂട്ടിന്റെ അടിവയറ്റിൽ കൊള്ളുകയായിരുന്നു.

പന്ത് കൊണ്ടപാടേ റൂട്ട് നിലത്ത് വീണ് വേദന കൊണ്ട് പുളഞ്ഞു. താരങ്ങളും അമ്പയർമാരും റൂട്ടിനടുത്തേക്ക് ഓടിയെത്തി. ഇംഗ്ലണ്ടിന്റെ മെഡിക്കൽ സംഘവും മൈതാനത്തേക്കെത്തി. മിനിറ്റുകൾക്ക് ശേഷമാണ് റൂട്ടിന് എഴുന്നേറ്റ് നിൽക്കാനായത്. വേദന സംഹാരികൾ കഴിച്ചാണ് റൂട്ട് ബാറ്റിങ് തുടർന്നത്.

അതിനിടെ പന്ത് കൊണ്ട് റൂട്ട് നിലത്ത് വീണപാടേ ചിരിയടക്കാൻ ഓസീസ് താരങ്ങളും കമന്റേറ്റർമാരും പാടുപെടുന്നുണ്ടായിരുന്നു. ഷോട്ടുകൾ കളിക്കാനും റണ്ണെടുക്കാനും റൂട്ട് ബുദ്ധിമുട്ടി. നാലാം ദിനത്തിലെ അവസാന പന്തിൽ സ്റ്റാർക്ക് തന്നെ റൂട്ടിനെ മടക്കുകയും ചെയ്തു.