ലഖ്‌നൗ: ഉത്തരാഖണ്ഡിനെതിരായ രഞ്ജി ട്രോഫി സെമി പോരാട്ടത്തിന്റെ ആദ്യ ദിനത്തില്‍ മികച്ച സ്‌കോറുമായി കര്‍ണാടക. ഇന്ത്യന്‍ താരം കെഎല്‍ രാഹുല്‍, ക്യാപ്റ്റനും മലയാളി താരവുമായ ദേവ്ദത്ത് പടിക്കല്‍ എന്നിവര്‍ നേടിയ കിടിലന്‍ സെഞ്ച്വറികളുടെ ബലത്തില്‍ ആദ്യ ദിനത്തില്‍ കര്‍ണാടക ഒന്നാം ഇന്നിങ്‌സ് 2 വിക്കറ്റ് നഷ്ടത്തില്‍ 355 റണ്‍സെന്ന നിലയില്‍ അവസാനിപ്പിച്ചു.

211 പന്തുകള്‍ നേരിട്ട് 11 ഫോറും 5 സിക്‌സും സഹിതം രാഹുല്‍ 141 റണ്‍സെടുത്തു മടങ്ങി. ദേവ്ദത്ത് പടിക്കലിനെ കൂട്ടുപിടിച്ച് രണ്ടാം വിക്കറ്റിൽ 278 റൺസിന്റെ കൂറ്റൻ സ്കോറുയർത്തിയാണ് രാഹുലിന്റെ മടക്കം. 5 റണ്‍സെടുത്ത മായങ്ക് അഗര്‍വാളാണ് പുറത്തായ മറ്റൊരു കര്‍ണാടക ബാറ്റര്‍.

കളി അവസാനിക്കുമ്പോള്‍ ദേവ്ദത്ത് പടിക്കല്‍ 148 റണ്‍സുമായും മറ്റൊരു മലയാളി താരം കരുണ്‍ നായര്‍ 37 റണ്‍സുമായും ക്രീസില്‍ തുടരുന്നു. പടിക്കല്‍ 236 പന്തില്‍ 16 ഫോറും 2 സിക്‌സും സഹിതമാണ് 148ല്‍ എത്തിയത്. കരുണ്‍ 5 ഫോറും ഒരു സിക്‌സും പറത്തി.