തിരുവനന്തപുരം: സീസണില്‍ 7 കളിയില്‍ ആറും തോറ്റ ട്രിവാന്‍ഡ്രം റോയല്‍സ് ജയം തേടി നിലവിലെ ചാംപ്യന്‍മാരായ ഏരീസ് കൊല്ലം സെയിലേഴ്‌സിനെതിരെ. കേരള ക്രിക്കറ്റ് ലീഗില്‍ ഇന്നത്തെ ആദ്യ പോരാട്ടത്തില്‍ കൊല്ലത്തിനു ജയിക്കാന്‍ 179 റണ്‍സ്.

ആദ്യം ബാറ്റ് ചെയ്ത ട്രിവാന്‍ഡ്രം നിശ്ചിത ഓവറില്‍ 6 വിക്കറ്റ് നഷ്ടത്തില്‍ 178 റണ്‍സെടുത്തു. ഒരിക്കല്‍ കൂടി ഓപ്പണറും ക്യാപ്റ്റനുമായ കൃഷ്ണപ്രസാദ് ടീമിന്റെ ടോപ് സ്‌കോററായി. താരം 35 റണ്‍സെടുത്തു.

സഹ ഓപ്പണര്‍ വിഷ്ണു രാജും ഭേദപ്പെട്ട ബാറ്റിങ് നടത്തി. താരം 25 പന്തില്‍ 2 വീതം സിക്‌സും ഫോറും സഹിതം 33 റണ്‍സടിച്ചു. അഞ്ചാമനായി എത്തിയ സഞ്ജീവ് സതീശനാണ് തിളങ്ങിയ മറ്റൊരാള്‍. താരം 20 പന്തില്‍ 3 സിക്‌സും 2 ഫോറും സഹിതം 34 റണ്‍സ് വാരി. 17 പന്തില്‍ 26 റണ്‍സടിച്ച നിഖില്‍, 16 പന്തില്‍ 20 റണ്‍സുമായി പുറത്താകാതെ നിന്ന അഭിജിത് പ്രവീണ്‍ എന്നിവരാണ് ട്രിവാന്‍ഡ്രത്തിനായി തിളങ്ങിയ മറ്റുള്ളവര്‍.

കൊല്ലത്തിനായി വിജയ് വിശ്വനാഥാണ് ബൗളിങില്‍ തിളങ്ങിയത്. താരം 3 വിക്കറ്റുകള്‍ വീഴ്ത്തി. ഏദന്‍ ആപ്പിള്‍, അമല്‍ എജി, അജയ്‌ഘോഷ് എന്നിവര്‍ ഓരോ വിക്കറ്റെടുത്തു.