പനാജി: തകർപ്പൻ ജയത്തോടെ വിജയ വഴിയിൽ തിരിച്ചെത്തി കേരള ബ്ലാസ്റ്റേഴ്സ്. ഈസ്റ്റ് ബം​ഗാളിനെ മറുപടിയില്ലാത്ത ഒറ്റ ​ഗോളിന് കീഴടക്കിയാണ് ബ്ലാസ്റ്റേഴ്സിന്റെ ജയം. ജയത്തോടെ മൂന്നാം സ്ഥാനത്തേക്ക് കയറാനും ബ്ലാസ്റ്റേഴ്സിനായി. 

ആദ്യ പകുതി ​ഗോൾരഹിതമായപ്പോൾ രണ്ടാം പകുതി തുടങ്ങി നാല് മിനിറ്റ് പിന്നിട്ടപ്പോഴാണ് കേരള ടീം വിജയ ​ഗോൾ വലയിലാക്കിയത്. 49ാം മിനിറ്റിൽ എനെസ് സിപോവിചാണ് വല ചലിപ്പിച്ചത്. ഹെഡ്ഡറിലൂടെയായിരുന്നു താരം ​ഗോൾ വലയിലിട്ടത്. 

ജയത്തോടെ ലീ​ഗിൽ 26 പോയിന്റും കേരള ബ്ലാസ്റ്റേഴ്സിന് സ്വന്തമായി. ഇത് ഐഎസ്എൽ ചരിത്രത്തിലെ കേരള ബ്ലാസ്റ്റേഴ്സിന്റെ ഏറ്റവും ഉയർന്ന പോയിന്റ് ആണ്. ഇതുവരെ ഒരു സീസണിലും കേരള ബ്ലാസ്റ്റേഴ്സിന് 26 പോയിന്റിൽ എത്താൻ കഴിഞ്ഞിരുന്നില്ല.

2017-18 സീസണിൽ നേടിയ 25 പോയിന്റ് ആയിരുന്നു കേരള ബ്ലാസ്റ്റേഴ്സിന്റെ ഐഎസ്എല്ലിലെ ഒരു സീസണിലെ ഇതുവരെയുള്ള ഏറ്റവും കൂടുതൽ പോയിന്റുകൾ. അതാണ് ഇന്ന് മറികടന്നത്. ആ സീസണിലെ ആറ് വിജയങ്ങൾ എന്ന റെക്കോർഡും ബ്ലാസ്റ്റേഴ്സ് മറികടന്നു. ഈ സീസണിൽ ടീം സ്വന്തമാക്കുന്ന ഏഴാം വിജയമാണ് ഇത്. ഏറ്റവും കൂടുതൽ വിജയങ്ങൾക്ക് ഒപ്പവും കേരള ബ്ലാസ്റ്റേഴ്സ് എത്തി.