ദിസ്പുർ: സന്തോഷ് ട്രോഫി ഫുട്ബോൾ ചാംപ്യൻഷിപ്പിൽ ഇന്ന് നടക്കാനിരുന്ന കേരളത്തിന്റെ മത്സരം മാറ്റിവെച്ചു. രാവിലെ ഒൻപത് മണിക്ക് നടക്കേണ്ട കേരളം -സർവീസസ് മത്സരമാണ് അവസാന നിമിഷം മാറ്റിവെച്ചത്. മത്സരം ഞായറാഴ്ച നടക്കുമെന്നും സ്ഥലവും സമയവും അറിയിക്കാമെന്നും സംഘാടകർ അറിയിച്ചു.

മത്സരത്തിനായി കേരളാ താരങ്ങൾ പുറപ്പെടാൻ നിൽക്കുമ്പോഴാണ് സംഘാടകർ വിവരം അറിയിക്കുന്നത്. ദിബ്രുഗഢ്-ധെമാജി പാതയിലുളള ഒരു ഗ്രാമത്തിൽ രണ്ട് ദിവസമായി യുവജനോത്സവം നടക്കുകയാണ്. ഇത് കാരണം വലിയ ഗതാഗതക്കുരുക്ക് ഉണ്ടായിട്ടുണ്ട്. ഇത് മറികടന്ന് ഇരു ടീമുകൾക്കും ഗ്രൗണ്ടിൽ എത്താൻ കഴിയില്ല എന്ന വിലയിരുത്തലിന്റെ അടിസ്ഥാനത്തിലാണ് മത്സരം മാറ്റി വെച്ചതെന്നാണ് അധികൃതർ നൽകുന്ന വിശദീകരണം.

നേരത്തെ, മേഘാലയയെ തോൽപ്പിച്ച് കേരളം സന്തോഷ് ട്രോഫി പോരാട്ടത്തിന്റെ ക്വാർട്ടറിലേക്ക് പ്രവേശം നേടിയിരുന്നു. നാല് കളിയിൽ നിന്നു 10 പോയിന്റുകളുമായാണ് കേരളം ക്വാർട്ടർ ഉറപ്പിച്ചത്.  ആതിഥേയരായ‍ അസമാണ് ക്വാർട്ടറിൽ കേരളത്തിന്റെ എതിരാളി. ഫെബ്രുവരി 3നാണ് മത്സരം നടക്കുക.