ലണ്ടന്‍: ഇംഗ്ലണ്ടിനെതിരായ അഞ്ച് ടെസ്റ്റുകളുടെ പരമ്പര നാളെ ആരംഭിക്കാനിരിക്കെ റെക്കോര്‍ഡുകളില്‍ പലതും ഇന്ത്യന്‍ ക്യാപ്റ്റന്റെ മുന്‍പില്‍ വന്ന് നില്‍ക്കുന്നു. കോഹ്‌ലിയുടെ സെഞ്ചുറി വരള്‍ച്ചയ്ക്കും ഇംഗ്ലണ്ട് പരമ്പരയോടെ അവസാനമാവും എന്നാണ് ആരാധകരുടെ പ്രതീക്ഷ.
8000 ടെസ്റ്റ് റണ്‍സ് എന്ന റെക്കോര്‍ഡ് ആണ് ഇവിടെ കോഹ് ലിയുടെ മുന്‍പില്‍ നില്‍ക്കുന്നത്. 92 ടെസ്റ്റില്‍ നിന്ന് കോഹ് ലി നേടിയത് 7547 റണ്‍സ്. 453 റണ്‍സ് ആണ് 8000ലേക്ക് എത്താന്‍ കോഹ് ലിക്ക് വേണ്ടത്. ഈ നേട്ടത്തിലേക്ക് ഇംഗ്ലണ്ടില്‍ വെച്ച് എത്തണം എങ്കില്‍ 2018ല്‍ പുറത്തെടുത്തതിനേക്കാള്‍ കൂടുതല്‍ മികവ് കോഹ് ലിയില്‍ നിന്ന് വരണം.
ഇംഗ്ലണ്ടിന് എതിരെ 2000 ടെസ്റ്റ് റണ്‍സ് എന്ന നേട്ടമാണ് അഞ്ച് ടെസ്റ്റുകളുടെ പരമ്പരയോടെ കോഹ്‌ലി മറികടക്കാന്‍ സാധ്യതയുള്ള ഒന്ന്. ഈ വര്‍ഷം ആദ്യം ഇന്ത്യയില്‍ വെച്ച് നടന്ന പരമ്പരയില്‍ ഇംഗ്ലണ്ടിനെതിരെ വലിയ മികവ് പുറത്തെടുക്കാന്‍ കോഹ്‌ലിക്ക് കഴിഞ്ഞിരുന്നില്ല. ഇംഗ്ലണ്ടിനെതിരെ 2000 റണ്‍സ് എന്ന നേട്ടത്തിലേക്ക് എത്താന്‍ 258 റണ്‍സ് കൂടിയാണ് കോഹ് ലിക്ക് ഇനി വേണ്ടത്.
ക്യാപ്റ്റന്‍ എന്ന നിലയില്‍ ഏറ്റവും കൂടുതല്‍ സെഞ്ചുറി എന്ന റെക്കോര്‍ഡ് ആണ് കോഹ് ലി ഈ പരമ്പരയോടെ സ്വന്തമാക്കാന്‍ സാധ്യതയുള്ള നേട്ടങ്ങളില്‍ മറ്റൊന്ന്. ക്യാപ്റ്റന്‍ എന്ന നിലയില്‍ 41 സെഞ്ചുറിയാണ് കോഹ് ലിയുടെ പേരിലുള്ളത്. ഈ നേട്ടത്തില്‍ റിക്കി പോണ്ടിങ്ങിന് ഒപ്പം നില്‍ക്കുകയാണ് കോഹ് ലി ഇപ്പോള്‍.
രാജ്യാന്തര ക്രിക്കറ്റില്‍ ഏറ്റവും കൂടുതല്‍ സെഞ്ചുറികളുള്ള രണ്ടാമത്തെ താരം എന്ന നേട്ടത്തിലേക്കും കോഹ്‌ലി ഇവിടെ എത്തും. 70 സെഞ്ചുറികളാണ് ഇപ്പോള്‍ കോഹ് ലിയുടെ പേരിലുള്ളത്. 70 സെഞ്ചുറിയുമായി പോണ്ടിങ്ങും കോഹ്‌ലിക്ക് ഒപ്പമുണ്ട്. 100 സെഞ്ചുറിയുള്ള സച്ചിനാണ് ഒന്നാമത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates