മാഡ്രിഡ്: സ്പാനിഷ് ലാലിഗയില്‍ റയല്‍ മാഡ്രിഡ് വിജയം സ്വന്തമാക്കി ഒന്നാമത്. നാലാം സ്ഥാനത്തുള്ള വിയ്യാറലിനെ അവര്‍ ഏവേ പോരാട്ടത്തില്‍ മറുപടിയില്ലാത്ത രണ്ട് ഗോളുകള്‍ക്കു വീഴ്ത്തി. ഫ്രഞ്ച് സൂപ്പര്‍ താരം കിലിയന്‍ എംബാപ്പെയുടെ ഇരട്ട ഗോളുകളാണ് ജയം നിര്‍ണയിച്ചത്.

ആദ്യ പകുതി ഗോള്‍രഹിതമായപ്പോള്‍ രണ്ടാം പകുതിയിലാണ് റയലിന്റെ രണ്ട് ഗോളുകളും വന്നത്. കളിയുടെ 47ാം മിനിറ്റില്‍ എംബാപ്പെ ടീമിനെ മുന്നിലെത്തിച്ചു. രണ്ടാം ഗോള്‍ അവസാന ഘട്ടത്തിലാണ് പിറന്നത്. 90 മിനിറ്റ് പിന്നിട്ട് മത്സരം ഇഞ്ച്വറി സമയത്തെത്തിയപ്പോള്‍ കിട്ടിയ പെനാല്‍റ്റി വലയിലാക്കിയാണ് എംബാപ്പെ ഇരട്ട ഗോള്‍ തികച്ചത്.

ജയത്തോടെ 21 കളിയില്‍ 51 പോയിന്റുമായാണ് റയല്‍ തലപ്പത്തേക്ക് കയറിയത്. 20 കളിയില്‍ 49 പോയിന്റുമായി ബാഴ്‌സലോണ രണ്ടാമത്. ബാഴ്‌സലോണ ഇന്ന് ഒവെയ്‌ഡോയെ നേരിടുന്നുണ്ട്. ജയിച്ചാല്‍ അവര്‍ 52 പോയിന്റുമായി വീണ്ടും ഒന്നാം സ്ഥാനം തിരിച്ചു പിടിക്കും.

മറ്റ് മത്സരങ്ങളില്‍ സെവിയ്യ 2-1നു അത്‌ലറ്റിക്ക് ബില്‍ബാവോയെ പരാജയപ്പെടുത്തി. വലന്‍സിയ 3-2ന് എസ്പാന്യോളിനേയും ഒസാസുന 1-3നു റയോ വാള്‍ക്കാനോയേയും പരാജയപ്പെടുത്തി.