ന്യൂയോര്‍ക്ക്: കോപ്പ അമേരിക്ക ഫൈനലിനിടെ പരിക്കേറ്റ അര്‍ജന്റീന താരം മെസിക്ക് രണ്ടാഴ്ചത്തെ വിശ്രമം വേണ്ടിവരുമെന്ന് റിപ്പോര്‍ട്ടുകള്‍. ക്ലബിനുവേണ്ടിയുള്ള അടുത്ത രണ്ട് മത്സരങ്ങളെങ്കിലും മെസിക്ക് നഷ്ടമാകുമെന്ന് ഇന്റര്‍ മയാമി കോച്ച് ജറാര്‍ദോ മാര്‍ട്ടിനോ പറഞ്ഞു.

മെസിയുടെ വലതു കണങ്കാലിന്റെ ലിഗമെന്റിന് ആണ് പരിക്കേറ്റതെന്ന് കോച്ച് പറഞ്ഞു. അദ്ദേഹത്തിന്റെ ചികിത്സാ പുരോഗതിയനുസരിച്ചായിരിക്കും അടുത്ത മത്സരങ്ങള്‍ കളിക്കുന്ന കാര്യത്തില്‍ തീരുമാനം ഉണ്ടാകുകയെന്നും അദ്ദേഹം കൂട്ടിച്ചേര്‍ത്തു. ഇന്റാര്‍ മയാമി നാളെ ടൊറോന്റയുമായി എറ്റുമുട്ടും. രണ്ടാമത്തെ മത്സരം ശനിയാഴ്ചയാണ്.

കൊളംബിയക്ക് എതിരായ ഫൈനല്‍ മത്സരത്തിനിടെ പരിക്കേറ്റ മെസി 67ാം മിനിറ്റിലാണ് കളിക്കളം വിട്ടത്. കളത്തില്‍ നിന്ന് കണ്ണീരണിഞ്ഞാണ് മെസി മടങ്ങിയത്. മത്സരത്തിന്റെ 37ാം മിനിറ്റില്‍ ഒരു ഷോട്ടിനിടെ വലതുകാലില്‍ കടുത്ത വേദനെയെതുടര്‍ന്ന് മൈതാനത്ത് കിടന്ന മെസി വൈദ്യ സഹായം ആവശ്യപ്പെട്ടിരുന്നു.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

ടൂര്‍ണമെന്റിന്റെ ഭൂരിഭാഗം സമയവും കാലിലെ പരിക്ക് മെസിയെ അലട്ടിയിരുന്നു. ടൂര്‍ണമെന്റില്‍ ഗ്രൂപ്പ് ഘട്ടത്തില്‍ ചിലിക്കെതിരായ രണ്ടാം മത്സരത്തിനിടെ മെസിയുടെ വലത് കാല്‍ത്തുടയിലെ പേശികള്‍ക്ക് പരിക്കേറ്റിരുന്നു. തുടര്‍ന്ന് പെറുവിനെതിരായ അവസാന ഗ്രൂപ്പ് മത്സരത്തില്‍ മെസി കളിച്ചിരുന്നില്ല.