മുംബൈ:  ടീം സെലക്ഷനില്‍ സിഇഒ വെങ്കി മൈസൂര്‍ ഇടപെടാറുണ്ടെന്ന ക്യാപ്റ്റന്‍ ശ്രേയസ് അയ്യരുടെ പ്രതികരണം വിവാദമായിരുന്നു. എന്നാല്‍ അതില്‍ തെല്ലും ആശ്ചര്യം തോന്നുന്നില്ലെന്ന പ്രതികരണവുമായാണ് ഇന്ത്യന്‍ മുന്‍ താരം അജയ് ജഡേജ എത്തുന്നത്. കൊല്‍ക്കത്ത ടീമില്‍ സിഇഒ നടത്തുന്ന ഇടപെടലുകളെ കുറിച്ച് എല്ലാവര്‍ക്കും അറിയാമെന്ന് അജയ് ജഡേജ പറയുന്നു. 

ശ്രേയസിന്റെ പ്രതികരണം ഒട്ടും ആശ്ചര്യപ്പെടുത്തുന്നില്ല. ഇത് കൊല്‍ക്കത്ത സിഇഒയുടെ ടീമാണ്. കളി ജയിച്ചാല്‍ പ്രശംസയും തോറ്റാല്‍ പഴിയും സിഇഒയ്ക്കാണ്. പല തരത്തിലുള്ള അഭിപ്രായങ്ങള്‍ വരും. സിഇഒ ടീം സെലക്ഷനില്‍ ഇടപെടേണ്ടതില്ല എന്നാണ് ചിലര്‍ പറയുന്നത്. ചിലര്‍ പറയും കോച്ചിനെ ടീം സെലക്ഷനില്‍ ഉള്‍പ്പെടുത്തേണ്ടതില്ലെന്ന് അജയ് ജഡേജ പറയുന്നു. 

ക്യാപ്റ്റനല്ല, സിഇഒയാണ് ഈ ടീമിനെ മുന്‍പോട്ട് കൊണ്ടുപോകുന്നത് എന്ന് നമുക്ക് ഇപ്പോള്‍ മനസിലാക്കാം. ടീം നടത്തില്‍ ക്യാപ്റ്റനെ യാതൊരു പങ്കുമില്ലെന്ന് അടുത്ത തവണ കൊല്‍ക്കത്തയുടെ കളി കാണുമ്പോള്‍ നമുക്ക് മനസിലാകുമല്ലോ എന്നും അജയ് ജഡേജ പറഞ്ഞു.

ശ്രേയസ് പറഞ്ഞത് പോലെ പ്ലേയിങ് ഇലവനില്‍ സ്ഥാനമില്ല എന്ന് ഒരു കളിക്കാരനോട് പറയുക എന്നത് പ്രയാസമാണ്. ലോകത്തിലെ ഏറ്റവും മികച്ച ഫാസ്റ്റ് ബൗളറെ കൊല്‍ക്കത്ത ബെഞ്ചിലിരുത്തി. ക്യാപ്റ്റനോ കോച്ചോ സിഇഒയോ ആരുമാകട്ടെ, പ്ലേയിങ് ഇലവനില്‍ ഇല്ല എന്ന് അവരോട് പറയുക എന്നത് എളുപ്പമല്ല എന്നും അജയ് ജഡേജ പറഞ്ഞു.

ഈ വാര്‍ത്ത കൂടി വായിക്കാം

വാക്ക് പാലിച്ച് സഞ്ജു; യശസ്വിക്ക് പുതുപുത്തന്‍ ബാറ്റ് ക്യാപ്റ്റന്റെ സമ്മാനം

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ