ദുബായ്: അഫ്ഗാനിസ്ഥാന്‍ ക്രിക്കറ്റ് ടീമിനെ ഏഷ്യയിലെ രണ്ടാമത്തെ മികച്ച ടീമെന്ന് വിശേഷിപ്പിച്ച് പാക് മാധ്യമപ്രവര്‍ത്തകന്‍. ത്രിരാഷ്ട്ര പരമ്പരയ്ക്കു മുന്നോടിയായുള്ള വാര്‍ത്താ സമ്മേളനത്തിലാണ് ഏഷ്യയില്‍ ഇന്ത്യക്ക് ശേഷമുള്ള മികച്ച ടീം അഫ്ഗാനിസ്ഥാന്‍ ക്രിക്കറ്റ് ടീമാണെന്ന് പാക് മാധ്യമപ്രവര്‍ത്തകന്‍ വിലയിരുത്തിയത്. പാകിസ്ഥാന്‍ ക്യാപ്റ്റന്‍ ആഗ സല്‍മാനും പത്രസമ്മേളനത്തിനുണ്ടായിരുന്നു. പാക് റിപ്പോര്‍ട്ടറുടെ വാക്കുകള്‍ കേട്ട് ആദ്യം മുഖത്ത് കൃത്രിമമായ ചിരി വരുത്തിയ ആഗ സല്‍മാന്‍ പിന്നീട് താഴേക്കുനോക്കി ഇരിക്കുന്നതും ദൃശ്യങ്ങളിലുണ്ട്.

2024 ലെ ട്വന്റി20 ലോകകപ്പില്‍ ചാംപ്യന്‍മാരായ ഇന്ത്യയ്ക്കു പുറമേ മികച്ച പ്രകടനം നടത്തിയ ഏഷ്യന്‍ ടീം അഫ്ഗാനിസ്ഥാനായിരുന്നു. ലോകകപ്പിന്റെ സെമി ഫൈനല്‍ വരെയെത്തിയ അഫ്ഗാന്‍ നിര കരുത്തരായ ഓസ്‌ട്രേലിയയെയും ന്യൂസീലന്‍ഡിനെയും തോല്‍പിച്ചിരുന്നു.

ഏഷ്യാ കപ്പിനുള്ള തയാറെടുപ്പായാണ് പാക്കിസ്ഥാന്‍, യുഎഇ, അഫ്ഗാനിസ്ഥാന്‍ ടീമുകള്‍ ത്രിരാഷ്ട്ര പരമ്പര കളിക്കുന്നത്. യുഎഇയില്‍ നടക്കുന്ന പരമ്പരയിലൂടെ അവിടത്തെ സാഹചര്യങ്ങളില്‍ കളിച്ച് മത്സര പരിചയം നേടുകയെന്നതാണു ടീമുകളുടെ ലക്ഷ്യം. ഏഷ്യാകപ്പില്‍ പാക്കിസ്ഥാന്‍, ഇന്ത്യ, ഒമാന്‍, യുഎഇ ടീമുകള്‍ എ ഗ്രൂപ്പിലാണ്. ബി ഗ്രൂപ്പില്‍ അഫ്ഗാനിസ്ഥാന്‍, ശ്രീലങ്ക, ബംഗ്ലദേശ്, ഹോങ് കോങ് ടീമുകളും കളിക്കും. ബാബര്‍ അസം, മുഹമ്മദ് റിസ്‌വാന്‍ തുടങ്ങിയ പ്രധാന താരങ്ങളില്ലാതെയാണ് ആഗ സല്‍മാന്റെ നേതൃത്വത്തിലുള്ള പാക്ക് ടീം ഏഷ്യാകപ്പിനൊരുങ്ങുന്നത്.