മാഞ്ചസ്റ്റര് സ്വന്തം തട്ടകത്തില് ന്യൂകാസിലിനോട് 0-2നാണ് പരാജയപ്പെട്ടത്. ചെല്സിയും തുടരെ രണ്ടാം തോല്വി നേരിട്ടു. ഇത്തവണ ഇപ്സ്വിച് ടൗണാണ് മുന് ചാംപ്യന്മാരെ അട്ടിമറിച്ചത്. നോട്ടിങ്ഹാം ഫോറസ്റ്റും ജയം സ്വന്തമാക്കി. ആസ്റ്റന് വില്ല- ബ്രൈറ്റന് പോര് സമനിലയില്.
റുബന് അമോറിമിനെ കൊണ്ടു വന്നു മുഖം മിനുക്കാനുള്ള മാഞ്ചസ്റ്റര് യുനൈറ്റഡിന്റെ ശ്രമം ഇതുവരെ ട്രാക്കില് കയറിയിട്ടില്ല. തുടരെ മൂന്ന് മത്സരങ്ങളായി അവര് പ്രീമിയര് ലീഗില് പരാജയപ്പെടുന്നു. ന്യൂകാസിലിനോട് രണ്ട് ഗോള് വഴങ്ങിയാണ് ഇത്തവണ തോറ്റത്. തോല്വിയോടെ അവര് 14ാം സ്ഥാനത്ത്. തരംതാഴ്ത്തല് ഭീഷണി നേരിടുകയാണ് അവര്. ഇനിയും തിരിച്ചു വന്നില്ലെങ്കില് പ്രീമിയര് ലീഗില് നിന്നു തന്നെ പുറത്താകേണ്ട സ്ഥിതിയിലേക്കാണ് അവര് പോകുന്നത്. മാഞ്ചസ്റ്റര് യുനൈറ്റഡിന് 22 പോയിന്റുകള്. നിലവില് റെലഗേഷന് സോണില് 18ാം സ്ഥാനത്തുള്ള ഇപ്സ്വിച് ടൗണിന് 15 പോയിന്റുകള്.
കഴിഞ്ഞ സീസണിലെ നിരാശയ്ക്ക് ഇത്തവണ മികച്ച ഫലങ്ങളിലൂടെ പരിഹാരം കണ്ട് മുന്നേറുന്നതിനിടെയാണ് ചെല്സിയുടെ തുടരെയുള്ള തോല്വികള്. ഇത്തവണ നിലവില് തരംതാഴ്ത്തല് സോണിലുള്ള ഇപ്സ്വിച് ടൗണ് അവരെ അട്ടിമറിച്ചു. 2-0ത്തിനാണ് ചെല്സി വീണത്. പോയിന്റ് പട്ടികയില് നിലവില് അഞ്ചാമതാണ് ചെല്സി.
ആസ്റ്റന് വില്ലയുടെ ജയിക്കാനുള്ള മോഹം ബ്രൈറ്റന് തല്ലിക്കെടുത്തി. 12ാം മിനിറ്റില് ലീഡ് വഴങ്ങിയിട്ടും വില്ല രണ്ട് ഗോളടിച്ച് തിരിച്ചു വന്നു. എന്നാല് കളിയുടെ അവസാന ഘട്ടത്തില് അവര് ഗോള് വഴങ്ങിയതോടെ പോരാട്ടം 2-2നു അവസാനിച്ചു.
ഇറ്റാലിയന് സീരി എയില് എസി മിലാന്- റോമ പോരാട്ടം സമനിലയില് പിരിഞ്ഞു. 1-1നാണ് പോരാട്ടം സമനിലയില് അവസാനിച്ചത്. മറ്റ് മത്സരങ്ങളില് ഫാബ്രിഗസ് പരിശീലിപ്പിക്കുന്ന കൊമോ- ലെക്സയെ 2-0ത്തിനു വീഴ്ത്തി. സനേറ്റി പരിശീലകിപ്പിക്കുന്ന വെറോന 3-2നു ബൊളോഞ്ഞയെ വീഴ്ത്തി.
എസി മിലാന് പരിശീലകന് ഫൊന്സേക്കയുടെ കസേര ഇളകി. ലീഗില് പ്രതീക്ഷിച്ച മുന്നേറ്റം ടീമിനു സൃഷ്ടിക്കാന് സാധിക്കാതെ വന്നതോടെയാണ് സീസണ് പകുതിയോടെ കോച്ചിന്റെ കസേര തെറിച്ചത്. പോര്ട്ടോ പരിശീലകനായി പ്രവര്ത്തിക്കുകയായിരുന്ന സെര്ജിയോ കോണ്സെയ്സോയാണ് പുതിയ എസി മിലാന് കോച്ച്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates