മുംബൈ: ഇത്തവണത്തെ ടി20 ലോകകപ്പ് വീട്ടിൽ നിന്ന് കാണേണ്ടി വരുന്നത് വിചിത്രമായ അനുഭവം ആണെന്ന് ഇന്ത്യൻ താരം രോഹിത് ശർമ്മ. ടി20 ലോകകപ്പ് ആരംഭിച്ചതുമുതൽ ഇന്നുവരെ ഓരോ ടൂർണമെന്റിലും ഞാൻ ഉണ്ടായിട്ടുണ്ട്. എന്നാൽ ഇത്തവണ താനില്ല, അത് എന്നെ സംബന്ധിച്ച് വേറിട്ടൊരു അനുഭവമാകുമെന്ന് ഒരു സ്വകാര്യ പരിപാടിയിൽ രോഹിത് പറഞ്ഞു.

"ഒരു ലോകകപ്പ് ടൂർണമെന്റ് നഷ്ടമാകുന്നു എന്നറിയുമ്പോൾ ശരിക്കും വേദനയുണ്ടാകുന്ന കാര്യമാണ്, പ്രത്യേകിച്ചും ടീമിൽ ഇല്ലെന്ന് മനസ്സിലാക്കുമ്പോൾ. പക്ഷെ മത്സരം കാണാൻ ഞാൻ സ്റ്റേഡിയത്തിൽ എവിടെയെങ്കിലും ഉണ്ടാകും. അത് എനിക്ക് വ്യത്യസ്തമായ ഒരു അനുഭവമായിരിക്കും'' രോഹിത് ശർമ്മ പറഞ്ഞു.

ഇത്തവണത്തെ ലോകകപ്പിൽ ഇന്ത്യൻ ടീം മികച്ച വിജയം നേടുമെന്നും അദ്ദേഹം പറഞ്ഞു. കഴിഞ്ഞ ലോകകപ്പ് നേടിയ ടീമിലെ 80-90 ശതമാനം താരങ്ങളും ഇപ്പോഴും ടീമിലുണ്ട്. അത് കൊണ്ട് ഇത്തവണയും ഇന്ത്യ തന്നെ കിരീടം നേടുമെന്നാണ് പ്രതീക്ഷ. കഴിഞ്ഞ രണ്ട് വർഷമായി ഇതേ താരങ്ങൾ ഒന്നിച്ച് കളിക്കുന്നുണ്ട്. ഇത് അവർക്കിടയിൽ നല്ലൊരു ഒത്തൊരുമ ഉണ്ടാക്കാൻ സഹായിച്ചിട്ടുണ്ട്. ഇത് ഇന്ത്യയ്ക്ക് കിരീടം നിലനിർത്താൻ സഹായകരമാകുമെന്നും അദ്ദേഹം പറഞ്ഞു.