സതാംപ്ടൺ: ഇന്ത്യൻ താരം ശുഭ്മാൻ ​ഗില്ലും കെയ്ൻ വില്യംസണും തമ്മിൽ സാമ്യമുണ്ടെന്ന് ന്യൂസിലാൻഡ് മുൻ നായകൻ ബ്രെണ്ടൻ മക്കല്ലം. യുവതാരമായിരുന്നപ്പോഴുള്ള വില്യംസണിനെ ചൂണ്ടിയാണ് മക്കല്ലത്തിന്റെ വാക്കുകൾ. 

​ഗില്ലിൽ എനിക്ക് വളരെ അധികം ആത്മവിശ്വാസമുണ്ട്. ഇപ്പോൾ തന്നെ വളരെ മികച്ച ക്രിക്കറ്റ് താരമാണ് ​ഗിൽ. ശുഭ്മാൻ ഇപ്പോൾ പ്രയാസകരമായി തോന്നിയേക്കാവുന്ന ഒരുകാര്യം എല്ലാവരും ​ഗില്ലിനെ സഹായിക്കാൻ നോക്കുന്നതാണ്. എല്ലാവരും ​ഗില്ലിനൊപ്പം നിൽക്കാൻ ആ​ഗ്രഹിക്കുന്നു. കാരണം ഇന്ത്യയുടെ എക്കാലത്തേയും മികച്ച താരമായി ​ഗിൽ മാറുമെന്നുള്ളത് കൊണ്ട് അവന്റെ കഥയുടെ ഭാ​ഗമാവാനാണ് അവരുടെ ശ്രമം, മക്കല്ലം പറഞ്ഞു. 

ഫിനിഷ്ഡ് പ്രൊഡക്റ്റ് അല്ല ഇപ്പോൾ ​ഗിൽ. എന്നാൽ മറ്റ് പലർക്കും ലഭിക്കാത്ത കഴിവ് ​ഗില്ലിനുണ്ട്. വില്യംസണിനെ കുറിച്ചും സമാനമായാണ് ഞങ്ങൾ പറഞ്ഞിരുന്നത്. ചിത്രത്തിലേക്ക് വില്യംസൺ കടന്നു വന്ന സമയം ന്യൂസിലാൻഡിന്റെ ഏറ്റവും മികച്ച കളിക്കാരിൽ ഒരാളാവുമെന്നാണ് പറയപ്പെട്ടിരുന്നത്. 

ഒരുപാട് ഉയരങ്ങൾ താണ്ടാൻ ​ഗില്ലിന് ചിലപ്പോൾ കഴിഞ്ഞേക്കില്ല. കാരണം സച്ചിൻ ടെണ്ടുൽക്കറെ പോലൊരു ഇതിഹാസത്തിന്റെ നേട്ടങ്ങൾ നമ്മൾ കണ്ട് കഴിഞ്ഞു. എന്നാൽ രാജ്യാന്തര ക്രിക്കറ്റിൽ ഏറെ നാൾ മികവ് കാണിക്കുന്ന ഒരു താരത്തെ ​ഗില്ലിലൂടെ നിങ്ങൾക്ക് കാണാനാവും. ടെസ്റ്റ് ചാമ്പ്യൻഷിപ്പ് ഫൈനലിൽ ടോപ് ഓർഡർ നല്ല ഓപ്ഷനാണ് ​ഗിൽ എന്നും മക്കല്ലം പറഞ്ഞു.