കൊൽക്കത്ത: മുൻ ഇന്ത്യൻ ക്യാപ്റ്റനും ഇതിഹാസ ബാറ്ററുമായ സൗരവ് ​ഗാം​ഗുലിക്കും ഭാര്യ ഡോണ ​ഗാം​ഗുലിക്കും നേരെ വധഭീഷണി. ബം​ഗാൾ ക്രിക്കറ്റ് അസോസിയേഷൻ പ്രസിഡന്റ് കൂടിയായ ​ഗാം​ഗുലിക്കും ഭാര്യയ്ക്കും കഴിഞ്ഞ ആറ് മാസത്തിനിടെ നിരവധി വധഭീഷണി കത്തുകളാണ് ലഭിക്കുന്നത്. സംഭവത്തിൽ ​ഗാം​ഗുലി പൊലീസിൽ പരാതി നൽകി.

തിങ്കളാഴ്ച അദ്ദേഹത്തിന്റെ ഓഫീസിലേക്ക് രണ്ട് ഭീഷണി കത്തുകൾ കൂടി ലഭിച്ചു. പിന്നാലെ അദ്ദേഹം ദ​ക്ഷിണ കൊൽക്കത്തയിലെ താക്കൂർപുകുർ പൊലീസ് സ്റ്റേഷനിലാണ് രേഖാമൂലം പരാതി നൽകിയത്. ​ഗാം​ഗുലിയുടെ മാനേജർ പറയുന്നതനുസരിച്ച് കഴിഞ്ഞ ആറ് മാസമായി നിരവധി വധഭീഷണി കത്തുകളാണ് തുടർച്ചയായി വരുന്നത്. എന്നാൽ ആദ്യ ഘട്ടത്തിൽ ഇത് ​ഗൗരവമായി എടുത്തിരുന്നില്ല.

തിങ്കളാഴ്ച വന്ന കത്തിൽ ​ഗാം​ഗുലിയേയും ഭാ​ര്യ ഡോണയേയും വധിക്കുമെന്നും ഏറ്റവും അടുത്ത ബന്ധുക്കളെ വെറുതെ വിടില്ലെന്നും ഭീഷണിയുണ്ട്. ഇതോടെയാണ് അദ്ദേഹം പരാതി നൽകിയത്.

പരാതി ​ഗൗരവമായി തന്നെ എടുത്തിട്ടുണ്ടെന്നു കൊൽക്കത്ത പൊലീസ് വ്യക്തമാക്കി. കത്തുകളുടെ ഉറവിടം, കൊറിയർ വിവരങ്ങൾ എന്നിവയെക്കുറിച്ച് പൊലീസ് അന്വേഷണം തുടങ്ങി.

കൊറിയർ സർവീസ് നടത്തുന്നവരെ ചോദ്യം ചെയ്യുകയും ഒരു മൊബൈൽ നമ്പർ കണ്ടെത്തിയതായും പൊലീസ് പറയുന്നു. ഈ നമ്പർ കേന്ദ്രീകരിച്ചാണ് നിലവിൽ അന്വേഷണം പു​രോ​ഗമിക്കുന്നത്.

നോർത്ത് 24 പർ​ഗാനസ് ജില്ലയിലെ ബെൽഘാരിയിൽ നിന്നുള്ള ഒരാളാണ് കൊറിയർ വഴി കത്തുകൾ അയച്ചത് എന്നു സൂചനകൾ കിട്ടിയിട്ടുണ്ട്. എല്ലാ കത്തുകളും അയച്ചത് ഒരേ വ്യക്തിയാണോ എന്നും ഇതിനു പിന്നിലെ യഥാർഥ കാരണം എന്താണെന്നും കണ്ടെത്താനുള്ള ശ്രമത്തിലാണ് പൊലീസ്.