ലണ്ടന്‍: മുന്‍ ലിവര്‍പൂള്‍, ഇംഗ്ലണ്ട് നായകനും മധ്യനിര താരവുമായ സ്റ്റീവന്‍ ജെറാര്‍ഡ് ഇംഗ്ലീഷ് പ്രീമിയര്‍ ലീഗ് ടീം ആസ്റ്റണ്‍ വില്ലയുടെ പുതിയ പരിശീലകന്‍. സീസണിലെ മോശം പ്രകടനത്തിന് പിന്നാലെ ഡീന്‍ സ്മിത്തിനെ പരിശീലക സ്ഥാനത്ത് നിന്ന് ക്ലബ് പുറത്താക്കിയിരുന്നു. പിന്നാലെയാണ് ജെറാര്‍ഡിന്റെ നിയമനം. മുന്‍ ഇംഗ്ലീഷ് നായകന്റെ വരവ് ക്ലബ് ഔദ്യോഗികമായി തന്നെ പ്രഖ്യാപിച്ചു.
11 കളികള്‍ പൂര്‍ത്തിയായപ്പോള്‍ ആസ്റ്റണ്‍ വില്ലയ്ക്ക് സീസണില്‍ മൂന്ന് വിജയങ്ങള്‍ മാത്രമാണ് ഉള്ളത്. അവസാനം കളിച്ച അഞ്ച് മത്സരങ്ങളും ടീം പരാജയപ്പെട്ടു. പിന്നാലെയാണ് സ്മിത്തിന്റെ കസേര തെറിച്ചത്.
കഴിഞ്ഞ മൂന്ന് വര്‍ഷമായി സ്‌കോട്ടിഷ് ടീം റെയ്‌ഞ്ചേഴ്‌സിന്റെ കോച്ചായിരുന്നു ജെറാര്‍ഡ്. റെയ്‌ഞ്ചേഴ്‌സിന് 55ാം കിരീടം സമ്മാനിച്ച ശേഷമാണ് ജെറാര്‍ഡ് ഇംഗ്ലീഷ് പ്രീമിയര്‍ ലീഗില്‍ പരിശീലകനായി എത്തുന്നത്.
ഡിസംബര്‍ 11ന് ജെറാര്‍ഡ് ലിവര്‍പൂളിന്റെ തട്ടകമായ ആന്‍ഫീല്‍ഡില്‍ ആസ്റ്റണ്‍ വില്ലയുടെ പരിശീലകനായി എത്തുന്നുണ്ട്. ഈ പോരാട്ടത്തിനായി കാത്തിരിക്കുകയാണ് ഫുട്‌ബോള്‍ ആരാധകര്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates