ബ്രിസ്ബെയ്ന്‍: ഓസ്ട്രേലിയക്കെതിരായ ബ്രിസ്ബെയ്ന്‍ ക്രിക്കറ്റ് ടെസ്റ്റില്‍ ഇന്ത്യ ഫോളോ ഓണില്‍ നിന്ന് കഷ്ടിച്ച് രക്ഷപ്പെട്ടു. ഒന്നാം ഇന്നിംഗ്‌സില്‍ 445 റണ്‍സ് എടുത്ത ഓസ്‌ട്രേലിയക്കെതിരെ ഫോള്‍ ഓണ്‍ ഒഴിവാക്കാന്‍ ഇന്ത്യയ്ക്ക് 246 റണ്‍സ് വേണമായിരുന്നു. 213 റണ്‍സില്‍ വച്ച് ഇന്ത്യയുടെ ഒന്‍പത് വിക്കറ്റുകളും നഷ്ടപ്പെട്ടെങ്കിലും പത്താംവിക്കറ്റില്‍ ബുംറയും ആകാശ് ദീപും നടത്തിയ രക്ഷാപ്രവര്‍ത്തനമാണ് ഫോളോ ഓണ്‍ ഭീഷണിയില്‍ നിന്ന് രക്ഷിച്ചത്.
ഫോളോ ഓണ്‍ ഒഴിവാക്കാന്‍ പൊരുതിയ രവീന്ദ്ര ജഡേജ ഒടുവില്‍ വീണത് ഇന്ത്യയുടെ പ്രതീക്ഷയുടെമേല്‍ കരിനിഴല്‍ വീഴ്ത്തിയെങ്കിലും അവസാന വിക്കറ്റില്‍ ബുംറയും ആകാശ് ദീപും ശക്തമായ പ്രതിരോധമാണ് കാഴ്ചവെച്ചത്. 123 പന്തില്‍ 77 റണ്‍സ് എടുത്ത രവീന്ദ്ര ജഡേജ ഒന്‍പതാം വിക്കറ്റ് ആയാണ് ഔട്ടായത്. ഏഴു ഫോറിന്റെയും ഒരു സിക്‌സിന്റെയും അകമ്പടിയോടെ വാലറ്റത്തെ കൂട്ടിപിടിച്ച് ടീമിനെ സുരക്ഷിത സ്ഥാനത്തേയ്ക്ക് നയിക്കുന്നതിനിടെയാണ് ജഡേജ ഔട്ടായത്.
തുടക്കത്തില്‍ കെ എല്‍ രാഹുലിന്റെ അര്‍ധ സെഞ്ച്വറിയാണ് ഇന്ത്യയെ വന്‍ തകര്‍ച്ചയില്‍ നിന്നും രക്ഷിച്ചത്. ഒരു വശത്ത് വിക്കറ്റുകള്‍ തുടര്‍ച്ചയായി വീണപ്പോഴും കെ എല്‍ രാഹുല്‍ പ്രതിരോധക്കോട്ട തീര്‍ത്തതാണ് ടീമിന് രക്ഷയായത്. സെഞ്ച്വറിയിലേക്ക് അടുക്കുന്നു എന്ന് തോന്നിപ്പിച്ച ഘട്ടത്തില്‍ 139 പന്തില്‍ 84 റണ്‍സ് എടുത്ത് നില്‍ക്കുമ്പോഴാണ് രാഹുല്‍ ഔട്ടായത്. ക്യാപ്റ്റന്‍ രോഹിത് ശര്‍മയുടെയും കെ എല്‍ രാഹുലിന്റെയും വിക്കറ്റുകളാണ് ഇന്ത്യക്ക് ആദ്യ സെഷനില്‍ നഷ്ടമായത്.
രോഹിത് ശര്‍മ വീണ്ടും നിരാശപ്പെടുത്തി. 10 റണ്‍സെടുത്ത രോഹിതിനെ പാറ്റ് കമ്മിന്‍സാണ് പുറത്താക്കിയത്. ലിയോണ്‍ ആണ് രാഹുലിനെ പുറത്താക്കിയത്. രണ്ട് ബൗണ്ടറികളടിച്ച് പ്രതീക്ഷ നല്‍കിയശേഷമാണ് രോഹിത് പുറത്തായത്. 27 പന്തില്‍ 10 റണ്‍സെടുത്ത രോഹിത്തിനെ കമിന്‍സിന്റെ പന്തില്‍ വിക്കറ്റിന് പിന്നില്‍ അലക്സ് കാരി പിടികൂടി. രോഹിത് മടങ്ങുമ്പോള്‍ ഇന്ത്യന്‍ സ്‌കോര്‍ ബോര്‍ഡില്‍ 74 റണ്‍സ് മാത്രമായിരുന്നു ഉണ്ടായിരുന്നത്. ആറാം വിക്കറ്റില്‍ രവീന്ദ്ര ജഡേജയെ കൂട്ടുപിടിച്ച് പൊരുതിയ രാഹുല്‍ ഇന്ത്യയെ 100 കടത്തുകയായിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates