ദുബായ്: ഐപിഎല്‍ കിരീടത്തിനും തങ്ങള്‍ക്കും ഇടയിലുള്ള മൂന്ന് മത്സരങ്ങള്‍ ജയിച്ച് കയറാനാവുമെന്ന് റോയല്‍ ചലഞ്ചേഴ്‌സ് ബാംഗ്ലൂര്‍ താരം എ ബി ഡി വില്ലിയേഴ്‌സ്. ഐപിഎല്‍ പോലൊരു ടൂര്‍ണമെന്റില്‍ ഒരു ദിവസം ഏത് ടീമിനും ഏത് ടീമിനേയും തോല്‍പ്പിക്കാമെന്ന് ഡിവില്ലിയേഴ്‌സ് പറഞ്ഞു.
തുടരെ നാല് തോല്‍വികള്‍ക്ക് ശേഷം വിജയ വഴിയില്‍ ബാംഗ്ലൂരിന് തിരികെ എത്താനാവും. ഞങ്ങള്‍ക്കും ഞങ്ങളുടെ ആദ്യ ഐപിഎല്‍ കിരീടത്തിനും ഇടയില്‍ നില്‍ക്കുന്ന മൂന്ന് മത്സരങ്ങള്‍ ജയിക്കാനാവുമോ? ഞങ്ങള്‍ക്ക് സാധിക്കും. ജയത്തിനും തോല്‍വിക്കും ഇടയിലുള്ള മാര്‍ജിന്‍ നേരിയതാണ്. എവിടെയെങ്കിലും പിഴവ് പറ്റുമ്പോള്‍ മുഴവന്‍ മാറ്റം വരുത്താന്‍ തോന്നും. എന്നാല്‍ പലപ്പോഴും എന്താണോ പ്ലാന്‍ അതില്‍ ഉറച്ച് നില്‍ക്കുന്നതാണ് ഗുണം ചെയ്യുക എന്നും ഡിവില്ലിയേഴ്‌സ് പറഞ്ഞു.
ഞങ്ങളുടെ ലക്ഷക്കണക്കിന് വരുന്ന ആരാധകരില്‍ സന്തോഷം നിറയ്ക്കാന്‍ സാധിക്കണം. കോവിഡ് ഭീതിക്കിടയിലും വീട്ടില്‍ കൂടുംബവുമായി ഒരുമിച്ചിരുന്ന് ഞങ്ങളെ പിന്തുണയ്ക്കുകയാണ് അവരെന്നും ഡിവില്ലിയേഴ്‌സ് ചൂണ്ടിക്കാണിച്ചു. സീസണില്‍ നാലാം സ്ഥാനക്കാരായാണ് ബാംഗ്ലൂര്‍ പ്ലേഓഫില്‍ കടന്നത്.
സീസണിന്റെ തുടക്കത്തില്‍ ജയങ്ങളിലേക്ക് എത്തിയെങ്കിലും അവസാനത്തോട് അടുത്തപ്പോള്‍ ബാംഗ്ലൂരിന് കാലിടറി. തുടരെ നാല് തോല്‍വികളിലേക്ക് വീണാണ് ബാംഗ്ലൂര്‍ പ്ലേഓഫിലേക്ക് കടന്നു കൂടിയത്. 14 പോയിന്റ് തന്നെയാണ് ബാംഗ്ലൂരിനും ഹൈദരാബാദിനും എങ്കിലും നെറ്റ്‌റണ്‍റേറ്റിലെ മുന്‍തൂക്കം ഹൈദരാബാദിനെ തുണച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates