ബാസെറ്റാറെ: ടി20 ക്രിക്കറ്റില്‍ അതിവേഗ സെഞ്ച്വറി നേടുന്ന ഓസ്‌ട്രേലിയന്‍ താരമെന്ന റെക്കോര്‍ഡ് ടിം ഡേവിഡിന് സ്വന്തം. വെസ്റ്റ് ഇന്‍ഡീസിനെതിരായ മൂന്നാം ടി20 പോരാട്ടത്തില്‍ 37 പന്തില്‍ 102 റണ്‍സടിച്ചാണ് താരത്തിന്റെ നേട്ടം. തുടരെ മൂന്നാം ജയത്തോടെ ഓസ്‌ട്രേലിയ ടി20 പരമ്പര ഉറപ്പാക്കുകയും ചെയ്തു. മത്സരത്തില്‍ 6 വിക്കറ്റ് ജയമാണ് ഓസീസ് പിടിച്ചെടുത്തത്.
റെക്കോര്‍ഡ് നേട്ടവുമായി സെഞ്ച്വറി കുറിച്ച ശേഷം ടിം ഡേവിഡ് മറ്റൊരു രഹസ്യവും വെളിപ്പെടുത്തി. വിന്‍ഡീസ് ഇതിഹാസ ഓള്‍ റൗണ്ടര്‍ ആന്ദ്രെ റസ്സല്‍ സമ്മാനിച്ച ബാറ്റുമായാണ് ടിം ഡേവിഡ് തീപ്പൊരി സെഞ്ച്വറി നേടിയത്. അതും റസ്സലിന്റെ ടീമായി വിന്‍ഡീസിനെതിരെ തന്നെ എന്നതും കൗതുകമായി.
ആദ്യം ബാറ്റ് ചെയ്ത വിന്‍ഡീസ് നിശ്ചിത ഓവറില്‍ 4 വിക്കറ്റ് നഷ്ടത്തില്‍ 214 റണ്‍സടിച്ചു. ഓസീസ് ഒരു ഘട്ടത്തില്‍ 87 റണ്‍സ് ചേര്‍ക്കുന്നതിനിടെ 4 വിക്കറ്റുകള്‍ നഷ്ടപ്പെട്ട് പരുങ്ങിയിരുന്നു. പിന്നീട് മിച്ചല്‍ ഓവനെ കൂട്ടുപിടിച്ച് ടിം ഡേവിഡ് അതിവേഗം ടീമിനെ ജയത്തിലെത്തിച്ചത്.
ടിം ഡേവിഡ് 11 സിക്‌സും 6 ഫോറും തൂക്കി 37 പന്തില്‍ 102 റണ്‍സുമായി പുറത്താകാതെ നിന്നു. മിച്ചല്‍ ഓവന്‍ 16 പന്തില്‍ 3 സിക്‌സും 2 ഫോറും സഹിതം 36 റണ്‍സുമായും പുറത്താകാതെ നിന്നു.
നേരത്തെ ക്യാപ്റ്റന്‍ ഷായ് ഹോപ്പിന്റെ സെഞ്ച്വറിയും സഹ ഓപ്പണര്‍ ബ്രണ്ടന്‍ കിങിന്റെ അര്‍ധ സെഞ്ച്വറിയുമാണ് വിന്‍ഡീസിന് മികച്ച സ്‌കോര്‍ സമ്മാനിച്ചത്. ഹോപ്പ് 57 പന്തില്‍ 6 സിക്‌സും 8 ഫോറും സഹിതം 102 റണ്‍സുമായി പുറത്താകാതെ നിന്നു. കിങ് 36 പന്തില്‍ 6 സിക്‌സും 3 ഫോറും സഹിതം 62 റണ്‍സെടുത്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates