ലഖ്‌നൗ: സയ്യിദ് മുഷ്താഖ് അലി ടി20 ടൂര്‍ണ്ണമെന്റില്‍ കേരളത്തിന് വിദര്‍ഭയോട് തോല്‍വി. ആറ് വിക്കറ്റിനായിരുന്നു വിദര്‍ഭയുടെ വിജയം. ആദ്യം ബാറ്റ് ചെയ്ത കേരളം 19.2 ഓവറില്‍ 164 റണ്‍സിന് ഓള്‍ ഔട്ടായി. മറുപടി ബാറ്റിങ്ങിന് ഇറങ്ങിയ വിദര്‍ഭ ഒന്‍പത് പന്തുകള്‍ ബാക്കി നില്‍ക്കെ ലക്ഷ്യത്തിലെത്തി. അഞ്ച് വിക്കറ്റ് നേട്ടവുമായി കേരള ബാറ്റിങ് നിരയെ തകര്‍ത്ത വിദര്‍ഭയുടെ യഷ് ഠാക്കൂറാണ് പ്ലെയര്‍ ഓഫ് ദി മാച്ച്.

ടോസ് നഷ്ടപ്പെട്ട് ആദ്യം ബാറ്റ് ചെയ്ത കേരളത്തിന് തുടക്കത്തില്‍ തന്നെ ക്യാപ്റ്റന്‍ സഞ്ജു സാംസന്റെ വിക്കറ്റ് നഷ്ടമായത് തിരിച്ചടിയായി. ഒരു റണ്ണെടുത്ത സഞ്ജു രണ്ടാം ഓവറില്‍ തന്നെ മടങ്ങി. തുടര്‍ന്നെത്തിയ അഹ്മദ് ഇമ്രാനും മൂന്ന് റണ്‍സെടുത്ത് പുറത്തായി. മൂന്നാം വിക്കറ്റില്‍ രോഹന്‍ കുന്നുമ്മലും വിഷ്ണു വിനോദും ചേര്‍ന്നുള്ള 77 റണ്‍സ് കൂട്ടുകെട്ടാണ് കേരളത്തെ കരകയറ്റിയത്. രോഹന്‍ 35 പന്തുകളില്‍ നിന്ന് 58ഉം വിഷ്ണു വിനോദ് 38 പന്തുകളില്‍ നിന്ന് 65ഉം റണ്‍സ് നേടി.

എന്നാല്‍ തുടര്‍ന്നെത്തിയവര്‍ അവസരത്തിനൊത്ത് ഉയരാതെ പോയത് കേരളത്തിന് തിരിച്ചടിയായി. രോഹന്‍ കുന്നുമ്മലിനും വിഷ്ണു വിനോദിനും പുറമെ 16 റണ്‍സെടുത്ത അബ്ദുള്‍ ബാസിദ് മാത്രമാണ് കേരള ബാറ്റിങ് നിരയില്‍ രണ്ടക്കം കടന്നത്. 19.2 ഓവറില്‍ 164 റണ്‍സിന് കേരളം ഓള്‍ ഔട്ടായി. വിദര്‍ഭയ്ക്ക് വേണ്ടി യഷ് ഥാക്കൂര്‍ 16 റണ്‍സ് മാത്രം വിട്ടു കൊടുത്ത് അഞ്ച് വിക്കറ്റ് നേടി. അധ്യയാന്‍ ധാഗ മൂന്നും നചികേത് ഭൂട്ടെ രണ്ടും വിക്കറ്റുകള്‍ വീഴ്ത്തി.

മറുപടി ബാറ്റിങ്ങിന് ഇറങ്ങിയ വിദര്‍ഭയ്ക്ക് ഓപ്പണര്‍ അഥര്‍വ്വ ടായ്‌ഡെ മികച്ച തുടക്കം നല്കി. 36 പന്തുകളില്‍ നിന്ന് അഥര്‍വ്വ 54 റണ്‍സ് നേടി. അമന്‍ മൊഖാദെ എട്ടും അധ്യയാന്‍ ധാഗ 16ഉം റണ്‍സെടുത്ത് മടങ്ങിയെങ്കിലും തുടര്‍ന്നെത്തിയവര്‍ അവസരത്തിനൊത്ത് ബാറ്റ് വീശിയതോടെ വിദര്‍ഭ 18.3 ഓവറില്‍ ലക്ഷ്യത്തിലെത്തി. ധ്രുവ് ഷോരെ 22ഉം ശിവം ദേശ്മുഖ് 29ഉം വരുണ്‍ ബിഷ്ട് 22ഉം റണ്‍സെടുത്തു. കേരളത്തിന് വേണ്ടി ഷറഫുദ്ദീനും എം ഡി നിധീഷും, അബ്ദുള്‍ ബാസിദും വിഘ്‌നേഷ് പുത്തൂരും ഓരോ വിക്കറ്റ് വീതം വീഴ്ത്തി.