കൊച്ചി: ഐഎസ്എല്‍ ഫൈനല്‍ പോരിന് ഇറങ്ങുന്ന കേരള ബ്ലാസ്‌റ്റേഴ്‌സിന് ആശംസയുമായി മമ്മൂട്ടി. പതിനൊന്ന് ചുണക്കുട്ടികളുടെ പടയോട്ടത്തിനായി കാത്തിരിക്കുന്നു എന്നാണ് ഫെയ്‌സ്ബുക്കില്‍ മമ്മൂട്ടി കുറിച്ചത്. 

കാല്‍പ്പന്തിന്റെ ഇന്ത്യന്‍ നാട്ടങ്കത്തില്‍ കേരള ദേശം പോരിനിറങ്ങുമ്പോള്‍ ലോകമെങ്ങുമുള്ള മലയാളികളെ പോലെ ഞാനും ഒപ്പമുണ്ട്. ഇന്നത്തെ രാവ് നമുക്ക് ആഹ്ലാദത്തിന്റേതാവട്ടെ...പതിനൊന്ന് ചുണക്കുട്ടികളുടെ പടയോട്ടത്തിനായി കാത്തിരിക്കുന്നു. കേരള ബ്ലാസ്‌റ്റേഴ്‌സ് ടീമിന് വിജയാശംസകള്‍...ബ്ലാസ്‌റ്റേഴ്‌സിന്റെ ഫോട്ടോ പങ്കുവെച്ച് മമ്മുട്ടിയുടെ കുറിപ്പ് ഇങ്ങനെ. 

ഫറ്റോര്‍ഡ മഞ്ഞക്കടലാവും

ഇന്ന് രാത്രി ഏഴരയ്ക്ക് ഫറ്റോര്‍ഡയിലാണ് ഐഎസ്എല്‍ ഫൈനല്‍. ഫൈനലിന് കാണികള്‍ക്ക് പ്രവേശനം നല്‍കിയതോടെ ഗ്യാലറി മഞ്ഞക്കടലാവുമെന്ന് ഉറപ്പാണ്. ലീഗ് ഘട്ടത്തില്‍ രണ്ട് വട്ടം ഏറ്റുമുട്ടിയപ്പോള്‍ ബ്ലാസ്‌റ്റേഴ്‌സും ഹൈദരാബാദും ഓരോ ജയം വീതം നേടി. രണ്ടാം സ്ഥാനക്കാരായാണ് ഹൈദരാബാദ് സെമിയിലേക്ക് കടന്നത്. ബ്ലാസ്‌റ്റേഴ്‌സ് നാലാം സ്ഥാനക്കാരായും. 

18 ഗോളുകളുമായി ഗോള്‍ഡന്‍ ബൂട്ട് സ്വന്തമാക്കാന്‍ നില്‍ക്കുന്ന ഒഗ്‌ബെച്ചെയെ ഫൈനലില്‍ നിശബ്ദനാക്കാന്‍ ബ്ലാസ്റ്റേഴ്‌സിന് കഴിയണം. സഹല്‍, വാസ്‌ക്വസ്, അല്‍വാരോ, ലൂണ എന്നീ ഫാബുലസ് ഫോറിന് ഹൈദരാബാദിന്റെ പ്രതിരോധത്തെ ഭേദിക്കാനുമായാല്‍ മഞ്ഞപ്പട കന്നി കിരീടത്തിലേക്ക് എത്തും.