കറാച്ചി: 71ാം സെഞ്ചുറിക്കായുള്ള വിരാട് കോഹ് ലിയുടേയും ആരാധകരുടേയും കാത്തിരിപ്പ് നീളുകയാണ്. ബെംഗളൂരുവിലും കോഹ് ലിക്ക് കാലിടറിയപ്പോള്‍ കറാച്ചിയില്‍ നിന്ന് ഹൃദയം തൊടുന്ന സന്ദേശവുമായി എത്തുകയാണ് പാക് ആരാധകര്‍. 

ഓസ്‌ട്രേലിയ-പാകിസ്ഥാന്‍ ടെസ്റ്റ് നടക്കുന്ന കറാച്ചി സ്റ്റേഡിയത്തിലെ ഗ്യാലറിയിലാണ് കോഹ് ലിക്ക് വേണ്ടിയുള്ള പോസ്റ്റര്‍ ഉയര്‍ന്നത്. അതില്‍ പാക് ആരാധകന്‍ കുറിച്ചത് ഇങ്ങനെ, പ്രിയപ്പെട്ട വിരാട്, സെഞ്ചുറി നേടിയാലും ഇല്ലെങ്കിലും, നിങ്ങളായിരിക്കും എന്നും എന്റെ ഹീറോ...

പാക് മാധ്യമപ്രവര്‍ത്തകനായ സജ് സാദിഖ് പാക് ആരാധകന്റെ ചിത്രം പങ്കുവെച്ചതിന് പിന്നാലെ സമൂഹമാധ്യമങ്ങളില്‍ ഇത് വൈറലായി മാറി. ഇത് ആദ്യമായല്ല കോഹ് ലിയോടുള്ള ഇഷ്ടം പാക് ആരാധകര്‍ പ്രകടിപ്പിക്കുന്നത്. റാവല്‍പിണ്ടിയില്‍ നടന്ന ആദ്യ ടെസ്റ്റിന് ഇടയില്‍ വന്ന ഒരു പാക് ആരാധകന്റെ ബാനറില്‍ കുറിച്ചിരുന്നത് ഇങ്ങനെ, നിങ്ങളുടെ 71ാം സെഞ്ചുറി പാക് മണ്ണില്‍ വെച്ച് നേടുന്നത് കാണാന്‍ ആഗ്രഹിക്കുന്നു...